nternational Year of Millet 2023 lawm bultanna, a khuhhawnna chu Mizoram Agriculture department buatsaihin Thawhtanni khan Aizawlah neih a ni.
India sawrkar rawtna angin kumin, 2023 hi United Nations Food and Agricultural Organization chuan International Year of Millets ah a puang a. Chumiin a tum ber chu zau zawk leh uar zawka millet thatna puanzar leh uar zawka chin a ni. Hemi bawhzui nan hian Mizoramah pawh nasa taka hmalak tum chhoh mek a ni.
-- Advertisement --
Agriculture mithiamte sawi danin, millets hi chi hrang 12 a awm a. Chu’ng zingah chuan Mizoin kan hriat lar chu faisa, puakzo leh buhtun a ni. Millets hian lei chhia leh hmun ro a ngam em em a, natna leh eichhetu liantham a neih loh avangin enkawl a nuam a, a thar hma em em bawk. Mihring taksa in a mamawh chaw tha tam tak a pai a, kan buh ei thin anga cholestorel chhia leh calorie a pai tam ve loh avangin zunthlum leh thisen sang nei tan chaw tha tak a ni.
A khuhhawngtu Agriculture minister C Lalrinsanga chuan sawrkar laipuiin millet that zia leh tangkai zia hriain UNO a rawtna a thlen angin kumin hi International Year of Millet a puan a ni tih sawiin, millet-ah hian mihring tana chaw tha tam tak a awm piahlamah ram economy nghawng pha hial khawpa sum lakluhna pawimawh a ni tih a sawi. “India sawrkarin kum tin cheng vaibelchhe tam tak lakluh nan millet hi a hmang a, Mizoram pawhin kan chhawr tangkai ve thei. Kan tan thil thar a ni loa, pi leh pute hun lai atanga chin tawh a ni a, ram tan ei leh bara intodelhna kawng pawimawh tak a nih avangin hemi kawngah hian ke kan pen a tha a ni,” a ti.
He hunah hian millet chin hlawk dan leh hriat tur tul te, taksa hriselna atana a tangkainate inhrilhhriat a ni.