MP thil tithei neih ve hi Zoram mipuiin kan phu – Dr K Beichhua

Mizoram tana development tak tak pawtchhuak theitu chu BJP a ni a, Mizoram mipuiin MP thil tithei neih ve hi kan phu tih State BJP hruaitu Dr K Beichhua chuan a sawi.
Thawhtannia an party office-a inkhawmah BJP Mizoram president Dr K Beichhua, MLA chuan central-ah BJP kaihhruai sawrkar kan hrawn mek avangin Mizoram tana development pawt chhuak tak tak thei tur chu BJP a ni a. BJP sawrkarna state-ah development nasa tak a thleng a, chutiang hun chu a nghahhlelh awm ve hle tih a sawi.
“Sawrkar awmze nei, MP thil tithei neih ve hi Mizoram mipui hian kan phu. Politics-a kan awm chhan hi hmasawnna a nih avangin, hma kan sawn theihna kawng pawimawh atan BJP tang kan belh a ngai a ni. Mizoram mipui hian BJP nihna dik tak hria a, hmasawnna kan beisei min thlensak theitu a ni tih kan hriat a ngai a ni,” a ti.
India ramah BJP leh a thawhpui NDA hnuaiah kum 12 chhungin Union minister zingah eiruk chungchanga hmingchhiatna nei tumah an la awm loa, hemi atang hian BJP sawrkar dik zia leh that zia a langchiang hle tih a sawi a. Direct benefit transfer kaltlangin eirukna tam tak awm thin an tibo a, kawng laka sum bo awm lo turin sawrkarin hma a la a, hei hian sum a nih dan tur ni loa lokal thin a tih tlem phah hle a, sawrkarin sum tam tak a hum theih phah tih a sawi.
Eiruk do kawngah CBI khawih theih piah lamah, Enforcement Directorate Central Agency (Ministry of Finance) hnuaia awmten hna an thawk tha hle, tiin, tunhnai maiah pawh Mizoram leh Myanmar-a kuhva raha sumdawnna ‘smuggling’ atangin cheng vaibelchhe 970 an man tawh a. Hei hi ‘e-way bill’ dik lo hmanga sumdawnna thil a nih avangin a serious em em a. Hengte avang hian buaina lian zawka kan tel lohnan Mizoram mipui pawh kan fimkhur a ngai hle tih State BJP president hian a sawi bawk.