Bul tan chhe chunga chak Vinales

Pathianni khan Texas-ah Grand Prix of the Americas MotoGP an tlan a, lap khatna lekah 11-naah tlahniam duai hman mah se ropui taka bike khalhin season kal laia a vawikhatna atan MotoGP race-ah Spaniard rider Maverick Vinales a chak.
COTA, Austin, Texas-a Pathianni Americas Grand Prix race kha tun season-a intlansiak tum 21 awm tura a vawithumna niin, hnehna chang Aprilia Racing rider Vinales khan point 56 nei tlingin 2024 MotoGP World Championship standing-ah pathumna a luah chho a, hmahruaitu leh a chipui Jorge Martin of Pramac Ducati lakah point 24-in a hniam.
Kum 29-a upa Vinales hi Inrinni sprint race-ah a chak a, Pathiannia intlansiak tak tak (main event)-ah pole position luah zuiin, beiseina sang tak nen bul tan bawk mah se lap khatnaah a talbuai a, mahse, 11-naa tlahniam hman chungin pakhatna dinhmun a luah a; teenage rookie Pedro Acosta chu pahnihnaah thlengin, pathumna chu Enea Bastianini a ni a; Championship hmahruaitu Jorge Martin chuan lawmman semna dawhsan chuangkai zo loin palina a hauh pha chauh thung.
Aprilia bike khalh chunga a chak leh hnuah Maverick Vinales kha manufacturer pathum tana Sunday race-a chak thei hmasaber niin, a hma lamah Suzuki leh Yamaha tan Pathianni intlansiak pui berah pakhatna a lo ni tawh a ni.