Bus hmang tangkaitu tam lo Lirthei zaa 70 vel 2-wheeler

Bus hmang tangkaitu tam lo
Lirthei zaa 70 vel 2-wheeler
Aizawl khawpui chhunga vahvelna atan bus service hmangtu an tam lo hle a, zaa 10 vel an ni. Za zela 41 vel chuan private two wheeler an lek chhuak a, kea kal chu za zela 27 vel nia chhut an ni.
Aizawl City Traffic Police-in an zirchiannaah kum 2024 khan Aizawlah hian mi 4,40,000 vel an cheng tawh nia chhut a ni a. Kum 2023 thlenga record an neih chinah Aizawl district-ah lirthei 2,30,000 awm tawh nia chhinchhiah niin, heng zinga zaa 70 chu two wheeler an ni.
Mipuiin vahvelna atana an hman theih turin city bus service 260 a awm a, line bus 33 awmin LMV taxi 3853 leh two wheeler taxi 3272 an awm tawh. Aizawl khawpuiah hian nitin lirthei 70000 atanga 85000 vel tlan thina ngaih a ni.
Aizawla mipui chetvelna atana hman dan zirchiannaah bus service hmangtu hi zaa 10 vel an ni a, taxi (LMV & 2-wheeler) auto rickshaw leh private car hmangtu zaa 30 vel niin, private two wheeler hmangtu zaa 41 an ni. Kea kal thin chu zaa 27 vel nia chhut a ni.
Kum 2024 chhung khan Aizawlah traffic dan bawhchhiat avanga lirthei man 10211 a awm a, heng zinga 7252 hi two wheeler niin, LMV 2104 man an ni.
Hetihlai hian Transport department chhinchhiah danin, sawrkar kum kal mekah 2024 December thleng khan Transport department test paltlanga driving license pekchhuah zat chu 21638 niin, lirthei 12216 ziahluh thar a ni.