Business meeting laiin business khar

Mihringin khawsakna leh eizawnna a buaipuina hi ‘business’ tih hian a huam vek awm e. Tuna G20 Business Meeting pawh hian, eizawnna kawnga ram rethei leh tanpui ngai zawkte hmasawn zelna tur kawng a dappui mek a ni a. Chutih laia khawpui chhung kawngpui kama eizawng mek hawker/street vendor-te eizawnna chawlhtir a ni hlauh hi thil intu lo tak, mi harsa zawkte tawrhna thlentir zawnga hmalakna a nih avangin, ‘sawrkar hian eng behchhana he thil hi kalpui nge a nih’ tih hi mipuiin an zawt zui luai luai a ni ber; social media lama sawi hlawh zualte zingah a tel pha a ni.
G20 palaite lo dawnsawn kawnga sawrkar a lo inbuatsaihna hrang hrangte hi a tha tawk viau a. Mikhualte mit tikham thei tur lo thenfai a, lo cheimawi te hi khualtha thleng tur kan nih avangin lo tihawm tak pawh a ni. Kawng leh lamah chuan khualtha thleng tura kan lo inbuatsaihnate hi kan hlawkpuina a ni nghal.
Hetih lai hian, kawngpui kama Hawker-te thutna dawhkan ruak intlar putte hi kan mikhualte hian engtin nge an ngaih ang? ‘Mizoram sawrkar chuan India ram khawpuia an lo tih thin ang thovin kawngpui kama inzuar duhte tan hmun a buatsaih a, mahse hmang tangkai duh an awm meuh lo a nih dawn hi mawle’ an ti ang nge? A nih loh vek leh, ‘hetiang Hawker table ruak kawngpui kama awm teuh hi engatinge an thenfai mai loh le’ an ti hlauh zawk dawn? Business sawiho avanga midang business nek bettu nih hi an duh hauhin a rinawm loh.
Kawngpui kama vawk in lo awmte pawh khuh mawi a ni awm a, kan mikhualte mit tikhamtu a nih palh venthawn thilah te, vawk rim chhe tak an hriat loh nan te pawh a ni mahna, a tha vek e. Hemi chungchangah pawh hian, Municipality huam chhungah Vawk vulh khap tih thawm te pawh thawkkhat lai khan a ri a, dan kan kengkawh zui leh si lo nge?
Eng pawh ni se, business chungchang ngaihtuah laia khawtual business thenkhat lo chawlhtir ngawt hi chu nakin hnu zelah pawh, tun anga khual tha hi kan la thleng lovang tih a sawi theih loh a, hetianga kalpui zel tur hi em ni dawn ta le?
Vawiin Chapchar Kut phei hi chu an tan chance tha tak a ni dawn si a, sawrkar hian engtin nge a tih zel dawn?