CADC-a sawrkarna siam
theih thu ZPM-in an thlen
Chakma Autonomous District Council (CADC) a MDC ngah ber ni ta ZPM MDC 10 chuan CADC-ah sawrkarna siam thei an ni tih Thawhtahnni khan larsap Dr Hari Babu Kambhampati hnenah an thlen.
ZPM MDC 10 hi CADC ZPM Legislature Party leader Mohan Chakma leh deputy leader Doymoy Chakma hoin Raj Bhavan-ah hian an kal a. ZPM vice president VL Zaithanzama, MLA leh adviser to chief minister (Political) Lalmuanpuia Punte ten an kalpui. Larsap hian thuthlukna a siam thuai tur thu a lo hrilh a ni.
Tarlan tawh angin, 2023 May 25 atanga CADC 11-na sawrkarna siamtu MNF MDC-te chuan an chief executive member Rasik Mohan Chakma, MLA chu phatsanin, kumin December 11-a CADC thutkhawmah CEM rintawk lohna putluh a ni a, paihthlak a ni. Hemi hma zawng hian MNF-in member 14 neiin, ZPM-in member 5, BJP-in member 1 a nei.
CEM phatsantu MNF MDC 13 zinga 8 chuan BJP an zawm a, December 13 khan lawmluh an ni. Member dang 5 chuan ZPM an zawm thung a, December 14 khan ZPM president Lalliansawta’n an party-ah a lawmlut.
CADC elected member 20 awmnaah hian tunah ZPM-in member 5 a neih sa nen MDC 10 a nei ta a, BJP-in 9 neiin, MNF-in 1 a nei a ni.
CADC-a sawrkarna siam theih thu ZPM-in an thlen
Get real time updates directly on you device, subscribe now.
Next Post