India Hnehna Ni pualin sipai martar-te zahna hlan

India Hnehna Ni pualin
sipai martar-te zahna hlan
India ram hmun dang rualin December 17 zing dar 8.00 khan Vijay Diwas (Hnehna Ni) pualin War Memorial Treasury Square-ah larsap Dr Hari Babu Kambhampati hoin sipai huaisen, ram tana nun hlantute hriatrengna leh zahna lantir a ni.
Vijay Diwas pual hian larsap hian hma hruaiin sipai martarte zahna lantirnan War Memorial-ah pangpar dahin zahna chibai a buk a. Chief minister Lalduhoma leh sawrkar hotu dang, police leh sipai hotute leh sipai bangten hriatrengna leh zahna lantirna pangpar an dah a ni.
Home minister K Sapdanga; MLA & Mizoram Ex Servicemen Leaque president Lt.Col. Clement Lalhmingthanga (Retd.); Padma shri & World War-II Veterans Association president Hav Lalbiakthanga, Home secretary Vanlalmawia; Mizoram Police IGP (Intelligence) Meenu Chaudhary; DIG of 23 Sector Assam Rifles Brig. Girish Upadhyay; Aizawl DC Er. Lalhriatpuia; Aizawl SP Rex Zarzoliana Vanchhawng leh mi pawimawh dang an tel a ni.
1971 December 16 khan Ramna Race Course, tuna Suhrawardy Udyan ni ta, Dhaka khawpui Bangladesh-ah India sipai hotu Lt. Gen. Jasgit Singh Aurora kaihhruai Allied Forces (India sipai leh Mukti Bahini) hmaah Pakistan sipai lalber (Chief of the Pakistan Forces) Lt. Gen. Amir Abdullah Khan Niazi leh a sipai 93000 chu Indo-Pakistan War of 1971 ah India laka tlawmin an inpe a. He hnehna avang hian East Pakistan, tuna Bangladesh ni ta hian Pakistan atangin zalenna a hmuh phah a. He ni hriatrengna atan hian kumtin Vijay Diwas hi India ram hmuntinah leh Bangladesh-ah December 16-ah hman thin a ni.