CADC ah campaign hun a tawp Tualthihna bialah zan curfew

CADC ah campaign hun a tawp
Tualthihna bialah zan curfew
May 9-a 11th Chakma Autonomous District Council 2023 inthlan neih turah campaign hun chu May 7 tlai dar 5.00 khan a tawp a. Inthlan buaipuitu turte pawhin an duty-na hmun tur an pan tawh. Hetihlai hian tunhnaia candidate thi awmna, 15-Rengkashya MDC bialah chuan zan lamah curfew puan a ni.
CADC Inthlanpuia assistant returning officer (ARO) chuan hriattirna tichhuakin, State Election Commission of Mizoram thuchhuak angin campaign hun hi Pathianni tlai dar 5.00 khan a tawp a, hemi atang hi chuan hemi huamchhunga vote neilote tan CADC huamchhungah awm phal a ni lo a, chhuahsan turin a hriattir. ‘Hei hi political party zawng zawng leh mipuiin zawm vek turin kan inngen a ni,’ a ti.
15-Rengkashya MDC constituency-a BJP candidate tualthih chungchangah ARO, Chawngte sub-divisional magistrate ni bawk chuan he bial (Rengkashya) huamchhunga mipui him tlan zawkna’n leh harsatna an tawh lohna’n Cr.PC 1973 Section 144 tlawhchhanin May 5-10 inkar hian zan dar 7.00 atanga zing dar 4.00 inkarah mipui pawn chhuah a khap a. Thupek bawhchhiate chu Sec.188 IPC hmangin hrem theih an ni tih sawiin, dan leh thupek kengkawhtu leh magistrate-in phalna a pekte a huam lo thung.
He thil thleng avang hian SEC chuan Rengkashya MDC bial bik tan inthlan hi May 17-a neih turin a sawnhla a. Hei vang hian May 9 hian constituency 19-a polling station 67-ah chauh vote thlak a ni ang.
SDM vek hian inthlan kaihhnawihah CADC huamchhunga silai neite chu May 7 ralhmaa an awmna atanga police station hnai bera an silai dah vek turin a hriattir bawk a. Thupek zawm lote chu Section 188 IPC hmanga hrem an nih tur thu leh thupek hi sut a nih loh chuan May 12 thleng a huam tur thu a sawi a ni.
CADC inthlanpuia duty tur, Chawngte atanga polling station hla deuh hmun 52-a polling party-te chu an duty-na tur hmun panin Pathianni khan an chhuak a. Returning officer, Lawngtlai district bawrhsap David Lalthantluanga chuan Chawngte SDO (Civil) pisa atangin duty tura chhuakte hi a thlah. Chawngte hnaih deuh polling station 15-a duty tur polling party-te chuan vawiinah an duty-na tur an pan ang.
Hetihlai hian Pathianni khan Deputy Inspector General of Police (DIG) Southern Range H. Ramthlengliana chuan CADC inthlanpuia venhimna lam inbuatsaihna enpuiin Chawngte a tlawh a ni.