CADC-ah party mala sawrkar siam kan inbeisei – Robert Romawia

CADC-ah party mala sawrkar siam
kan inbeisei – Robert Romawia
Chakma Autonomous District Council-ah MNF chuan party mala sawrkar siam an inbeisei tih minister
Robert Romawia Royte chuan a sawi.
May 9-a inthlang tur CADC inthlana Chawngte leh a chhehvela campaign MNF adviser ni bawk Robert Romawia chuan Chakma mipuiin Pu Zoramthanga sawrkarin Mizoram dung leh vanga hmasawnna hna a thawh dan leh Chakma area-a sawrkar hmalakna hrang hrang a takin an hmu a; hmasawnna liantham thawh tur a insehmur mekte an hmuh bawk avangin MNF party ngei an thlantlin leh a ring tih a sawi.
District Council & Minority Affairs minister ni bawk chuan, CADC huamchhunga school sakthat ngaite sakthat vek tum a ni tih sawiin, Chawngte to Barapansury kawngpui chu cheng nuai 4000 sengin siam tan mek a nih thu te, Chawngte chhung kawng pawh cheng nuai 500 senga siamthat a nih tur thu te, Kamalanagar College-ah IT Centre siamna atan cheng nuai 99 sanction a nih thu leh hostel pawh cheng nuai 280 chuangin sak mek a nih thu te a sawi bawk.
MNF sawrkarin Covid hrileng kara hmasawnna hna Zoram kiltina a thawh dan chu mipuiin an hai loa, leirem rapa sawrkar a che tan mek chu hmuhnawm tham a tling tih Robert Romawia hian sawiin, “SEDP batch no.1 chhungkaw 60000 ten instalment hnih an dawng tawh a, a instalment thumna tur MLA inthlan hmaa sem leh tum a ni. SEDP batch no.2 ah pawh chhungkaw 60000 dang thlan mek a ni a, an ni pawh hi sawrkarin a pe leh dawn. SEDP hi a tir atanga kan hotute sawi angin, cheng nuai 3 aia tlem loa instalment system-a sem zel tur a ni,” a ti.