Dengue laka himna tur inhrilh
State Vector Borne Disease Control Programme (SVBDCP) buatsaihin Aizawl Municipal Corporation hnuaia Local Council, MHIP leh MUP te nen ni hnih chhung awh tur Dengue natna hluar tur laka inven leh he natna awm lo tura hma lak dan inzirtirna chu Nilaini khan Aizawlah neih tan a ni.
Health Services director Dr Vanlalsawma chuan Dengue laka inveng tura khawtlang, kohhran leh pawl hrang hrangte nen thawh ho that a tul tih a sawi a. Natna do chu Health department hna a ni a, natna tuartu erawh mipui kan ni, tiin, natna do kawngah tanrual a, thawhho a tul tih a sawi a ni.
Health department hotute sawi danin, Dengue hi India ram hmun hrang hrangah a hluar hle a, Mizoramah pawh kum tin he natna vei zat hi pung chho zelin, nunna chan phah pawh an awm ta a. Thosi atanga natna kai theih dang – Malaria tlukin mi tamtakin kan la hmelhriat loh natna a ni. Khawvel changkang chho zelin a ken tel, mipui zin veivak pung leh ram leh ram intlawhpawhna tha avangin Mizoramah pawh Dengue vei kan pung zel a. A bikin Aizawl leh Lunglei district-ah a hluar bik a ni.
Natna pung chak tak a nih avangin inven kawngah tan lak reng loh chuan, Malaria tluka buaipuiawm a nih mai a hlauhawm hle tih an sawi a. He natna vei zat pun chhohna atanga tehin, kuminah pawh hei aia nasa zawkin pung chho zel thei a nih avangin khawtlang, kohhran leh pawl hrang hrang te tangrual a, tun aia nasaa he natna tibo tura tan lak a tul tih an sawi a ni.
-- Advertisement --
Kum 5 chhunga Mizorama Dengue dinhmun
Kum Sample lak Positive Nunna chan
2019 853 131 –
2020 623 67 –
2021 420 83 –
2022 5252 1868 5
2023 1247 143 –
(April 27 thleng)