Café culture-in ruihtheih a tih hluar phah niin hria

Café culture avangin thalaite zingah ruihtheihthil a hluar phah niin ruihtheihthil do kawnga hma latute chuan an sawi.Home minister K Sapdanga leh Excise & Narcotics minister Lalnghinglova Hmar kaihhruaiin Thawhlehni khan ruihhlo do beihpui thlak dan thlirlet a ni a. Home Department, Excise & Narcotics Department, Food & Drugs Administration leh Central YMA hruaitute bakah Aizawl bawrhsap leh SP an tel. Ruihhlo zuartu, ngawlvei leh ruihhlo zawrh leh inhlanchhawn dan kawng hrang hrang an sawi a. Ruihhlo do leh a hmangsualte leh a zuarte laka beihpui thlak zel dan tur ruahman a ni.
Tun dinhmunah Mizoramah ruihna atana hman chi hrang hrang – heroin, khuh damdawi, ganja leh ruihhlo dang a hluar hle a. Aizawl bikah café culture uar thar avangin thalaite zingah ruihtheih thil hmanna a hluar phah hle nia an hriat thu sawi a ni.
Tunhnaiah khuh damdawi (cough syrup) chu dan ang thlapin Dak In (post office) kaltlangin Mizoramah a lo lut hnem hle tih hriat a nih thu sawi a ni a. Hemi chungchanga hmalak dan tur pawh sawi a ni.
Mizoram pumah sawrkarin September 2025 atang khan ‘Operation Jericho’ tiin ruihhlo do beihpui a thlak a. Tun tum thutkhawmah hian Operation Jericho a hlawhtlin thu sawi a ni a, tha thlah loa kal zel tha an ti.