CAMPA fund-a hnathawh enfiah
CAMPA fund-a hnathawh enfiah
Mizoram State Project Monitoring Committee (MSPMC) Inspecting Team chuan an vice chairman R Lal Rinawma hoin Ningani khan Sairang Dinthar-a CAMPA fund hmanga hnathawh hrang hrang an endik.
Steering Committee of State Authority of CAMPA Mizoram State thurel bawhzuia Finance department leh Planning & Programme Implementation department thuchhuak angin, MSPMC hi Mizoram State CAMPA fund hman dan endik tura ruat a ni a. State CAMPA fund atanga hnathawh mek leh sum hman dan dilin a zirchiang a. Chumi hnuaia field inspection hmasa ber neihna atan Central Nursery Sairang Dinthar a thlang a ni.
Sairang-a nauban chinna hmun siamthat mek leh, thing leh hnim chi hrang hrang chungchang sawifiahna hmun – Interpretation Centre tihchangtlun leh enkawl hna thawh meka sum hman dan leh hnathawh a inphu em tih leh, an hnathawh a tling tha em tih an endik a. An report hi Mizoram sawrkarah an la thehlut leh dawn a ni.
MSPMC Team hi Aizawl Forest Division hotuten an lo dawngsawng a ni.
March 16–18 chhung khan Mizoram State Project Monitoring Committee (MSPMC) Inspecting Team chu team hniha inthenin Mizoram chhim lam leh chhimthlang lama hmasawnna hnathawh sector hrang hrang project 16 an endik.
An endik zing ami, Lunglei khawpui tui lakna Tlawng/ Pialthleng luia tuikhuah siam mek chu a thuk zawng metre 13, tui chim chin tur metre 12 km 1.360-a thui tling li tura ngaih niin, tui tam laiin tui litre maktaduai 240 khuah tlin theih tura ngaih a ni. Tui khuah hna hi zawh thawkhat niin, spillway leh apron siam leh tur a ni a. Hei hi kumin March chhunga zo fel tura tih a ni.
Lunglei khawpui bawlhhlawh sawngbawlna tur, Solid Waste Management Centre Pukpui daia sak mek chu Swachh Bharat Mission (Urban) 2.0 leh ringfenced fund atanga cheng nuai 385.6 senga thawh a ni a. Tunah hian zaa 50 vel zawh tawh niin, kumin August hi zawh hun tura bituk a ni.
MSPMC Team-in project an endik tam zawk hi Mizoram mipui mamawhna sang tawh tak kara beisei anga hnathawh chak si lote a ni hlawm tih sawi a ni a. Inspecting Team hi department aiawhte, contractor-te, khawtlang hruaitute, tlawmngai pawl aiawh leh MJA ten tawiawmin, harsatna hrang hrang leh chak zawka hna thawh a nih theihnana rawtna an sawiho.