Canada-ah chuan zu chungchangah sorkarin rawtna thar siamin zu in miah loh chu a tha ber a ti a. I in duh a nih pawhin kar khatah tum hnih bak in suh a ti bawk.
-- Advertisement --
Tuna sorkarin thurawn a pek hi a hmaa rawtna a siam kum 2011-a tihchhuah lakah chuan danglam tak a ni a. Khami tum kha chuan kar khatah tum 10 hmeichhe tan leh mipa tan tum 15 in him angin a sawi thung.
Tuna report thar hi Health Canada kaihhruaina hnuaia kalpui niin zu kaihhnawih tinrenga thurawn pekna a ni.
“Tuna kaihhruaina thar hi chuan zu hi i hriselna atan a tha mawlh lo a ti a ni,” tiin Erin Hobin, Public Health Ontario a senior scientist leh he thurawn siamtu zinga tel chuan a sawi a, “Zu i in tlem poh leh i tan a tha,” a ti zui bawk.
Canadian Centre on Substance Use and Addiction (CCSA) tena guidelines an siam hi phek 90 laia chhah niin zu avanga hriselna chhe thei thil hrang hrangte tun hma zawnga pawi lo nia ngaihte an tarlang a ni.
CCSA te chuan zu 5% vel kar khata tum hnih aia tam in chuan mihring taksa tichhe theiin hnute leh colon cancer a thlen thei an ti a. Canadian puitling 80% zu in thin te tan chuan a na viau mai thei an ti bawk.
“He guidelines hian min barakhaih viau,” tiin Dr hobin chuan a sawi a, “Information tharlam ber niin kar khata zu tum thum emaw in chuan lu leh nghawng cancer a thlen theihna chu 15% in a tipung a, a bak inbelh zel phei chuan a nasa tial tial,” tiin a sawi a.
“Kar khata zu tum thum in chu Canadians tam ber te tan chuan zu in tam tia sawi theih tur a ni lo,” tiin a sawi bawk.
Canadian expert te chuan a hmaa guideline an siam aia nasa fe maia zu in thatlohna an sawi chu research hmanga finfiahna an neih that tak vang tiin an sawi a.
Canada-in recommendation thar a kalpui hi ram dangte nena khaikhin chuan danglam nasa tak a ni a. Australia national guidance chuan kum 2020 khan kar khatah standard drink tum 10 him angin a sawi a, France pawh a ti ve tho bawk.
US erawh chuan mipate tan ni khatah zu no hnih aia tam in lo turin a ti a, hmeichhiate tan no khat, UK chuan kar khatah zu no ruk bak in loh tur a ti thung.
Canadians te hockey an ngainat tluk zeta beer ngaina ten tuna rawtna leh thurawn thar hi an zawm dan tur erawh hriatchian mai theih a ni lo thung.
Zu in nasat dan chhui chiangtu Global Drug Survey chuan Canada chu zu in nasatna ram top 10 ah pawh an chhiar tel lo va. Mahse, zu ruih hratna lamah chuan parukna lai niin US leh UK hnuai chiahah an awm thung.
“Zu hi kan culture-a bet tlat a ni a, thil pangngai a ni a, vantlang pawm a ni,” tiin Dr Hobin chuan a sawi a, “Piancham lawmna, inneihna, Inrinni zana hockey khelh en chang pawhin zu chu awm tursaa ngaih a ni,” tiin a sawi.
CCSA scientists te chuan meizuk hlauhawmna langsar taka kalpui ang thovin zu thatlohna tarlan hi kalpui a ngai an ti bawk.