Cancer Khualbukah Hospice Ward

Cancer Khualbukah Hospice Ward
Cancer Society of Mizoram bultumin Zirtawpni khan Zemabawk Cancer Khualbuk building-ah Hospice Ward hawn a ni.
A hawngtu Aizawl East I bialtu MLA, minister Lalthansanga chuan, Cancer Hospice an hawn chu building a ni mai loa, he hmun hi cancer natna tuarte tan hmangaihna in, khawngaihna hmun leh beiseina thar chhuahna hmun a ni dawn tih a sawi.
“Cancer natna hian damdawi enkawlna chauh ni loin rit takin rilru a delh a, sum leh pai lama buaina, chhungkaw nunah nghawng nasa tak a siam thin. Chutiang hun harsa takah chuan damdawi enkawlna bakah mihringte mamawh ber pakhat chu hmangaihna, ngaihsakna leh midangte awmpuina a ni. Cancer Hospice hian chu mamawh chu a phuhruk dawn a. Helai hmun rawn lut chu natna avanga hrehawmna an tawh laiin enkawlna leh awmpuina an dawng thei dawn a. Hmangaih taka enkawlna tha hian chhungte tan pawh thlamuanna nasa tak a siam thei dawn a ni,” a ti.
Cancer Society of Mizoram-in kum tam tak chhung chu cancer data screening programme neiin, damlo tan tanpuina pek leh natna do kawngah theihtawp a chhuah thin tih a sawi a. Cancer Hospice hawn a ni pawh an hmalakna ropui tak a ni tih sawiin, kohhran, pawl, mipui leh mimal inphal tak tak tanpuina petute hnenah lawmthu a sawi tih a sawia ni.
Hospice Ward hi cancer natna vei, damdawi in leh in lama enkawl harsa tawhten nuamsa zawka enkawlna an dawn theihna tura siam a ni a. He ward hi Mizoram Rural Bank CSR fund leh mi inphalte bakah pawl hrang hrang sum thawh khawm atanga sak a ni. Tunah hian khum 10, doctor 1, nurse 5 leh caretaker 1-in an vil mek a, damlo enkawlna bungrua leh mamawh hrang hrang awmin tichangtlung tura hma lak zel a ni.