Tuihri ni ah ngai lo

Tuihri ni ah ngai lo
Lawngtlai district Darnamtlang-a hrileng chu tuihri nia ngaih ni mah se, a nia hriat a ni lo tih sawi a ni.
Darnamtlang-a kawtha lo leng chungchangah Lawngtlai bawrhsap Donny Lalruatsanga kaihhruaiin Health department hotute leh MJA Lawngtlai District hruaitute chu Zirtawpni khan an thukhawm a. Hrileng nia sawi hi sawrkarin a vil reng a, chiaina tur a awm lo tih bawrhsap hian a sawi. Tun dinhmuna vil mektu Medical Team thurawn ngaipawimawh tur leh he natna vei leh inringhlel chuan Sub- Centre leh PHC pan zung zung turin a chah tih a sawi a ni.
Senior chief medical officer Lawngtlai Dr Lalmuanawma Jongte chuan damlote nat dan atangin hrileng chu Tuihri a nih a rinawm loh a, sample la in enfiah erawh tum tho a ni tih a sawi. Hrileng a awm tih hriat a nih hnuah Medical Team tirin ngun takin Darnamtlang hi vilin, an mamawh tur damdawi thawnluh a ni a, tun dinhmunah Darnamtlang khawchhungah damlo pali awmin an dinhmun a ngaihtuahawm loh a, Bungtlang South PHC-a mi pahnih inentir pawh admit ngai an niloa, he natna vang hian Bungtlang South PHC-ah mi pakhat enkawl mek niin, a dinhmun a tha tih a sawi a ni.
Hriat theih chinah kawthalo vei mi pasarih an awm a, hrileng anga ngaih theih a ni rih loa, damlote pawh enkawlna tha tak nen ngaihtuahawm an awm lo tih a sawi bawk.
Kawthalo leh luak vangin June 2 khan Darnamtlang mi Zeria (53) a thi a, heimi hnu hian mipui an mangang zual deuh nia hriat a ni. Darnamtlang hi in 115, mihring 540 vel chenna niin, Bungtlang South PHC hnuaia awm a ni.