Candidate atana tha ber nia hriatte kan dah – Lalduhoma

Zoram People’s Movement chuan MLA inthlanpui atana bial tinah an party tana tha ber tur nia an hriatte an dah tih ZPM Nomination Committee member, an party leader Lalduhoma chuan a sawi a. Party office bearers seat pek vek chu an ni chauh ni lo, party dang pawhin an tih phung a ni bik chuang lo tih a sawi.
ZPM Campaign Committee chairman ni bawk Lalduhoma chuan MLA inthlan atana an party official candidate tur an puan tak zingah thlemna tinrenga an thlem a, an thlemthluk zawh loh an awm tih a sawi. “Congress party pawh an lo la hausa viau aniang, kan candidate zingah an lama kal tura cheng nuai za tela thlem an nei,” a ti a. An candidate zingah party dangin Rajya Sabha member ni tura thlem pawh an nei nia sawiin, political party sum ngah tak pahnih an hmachhawn dawn tih a sawi bawk.
MNF chu 2018 MLA inthlan atang tawha Delhi (BJP) sum ringa kal an la nih thu leh tunah pawh an la inzawm reng tih tichiang turin tunhnaia NDA meeting-ah an la tel tih a sawi.
ZPM ticket-a MLA candidate-te chuan a remchanna zawng zawngah eiru lo tura intiamna an nei dawn a, Val Upa Council hmaah an intiam dawn tih ZPM leader hian a sawi. Sum leh pai thiltih theihna in hna a thawk ta lo tih Serchhip MLA by election, Lunglei Muncipal inthlan leh Zemabawk Local Council by election ah te a lang a, sum thiltih theihna tih mualphoin a awm tih a sawi.
Zawhna chhangin Lalduhoma chuan, MLA bial tinah an party tana tha ber tur nia hriat candidate an dah a, loh theih loh thil a awm nih ngawt loh chuan an tidanglam dawn tawh lo tih a sawi. An party OB zingah candidate an chan vek loh chungchang chu, “OB nih vanga candidate chan tur tih dan hi tu party mahin an dah bik lo,” a ti. Tuichawng biala candidate an la tifel lo chu, Chakma area a nih vanga la tichiang lo an ni tih a sawi a, an dah lo thei hial bawk tih a sawi. An party ah mitha an tam a, bial 40 bak bial 40 dang pawh la awm se, tuna an thlante ang tluk thlanchhuah tur an la nei niin a sawi bawk.
An party constitution anga an kal loh chungchang zawhna pawh ZPM leader hian, Covid chho atang khan a tak takin an la hmang hleithei loa, party-a thuneitu VUC leh OB te hriatpui leh rorelna ang zelin, ‘ruat era’ in an la kal rih a, an la inruat chawp rih zel tih a sawi. Term thar atang chuan an constition anga an kal theih tawh tur thu a sawi a ni.