Buh natna chi khat leng

Buh natna chi khat leng
Buh natna chi khat leh pangang puang vangin Sialhawk khua chuan harsatna an tawk mek a, agriculture department mithiamten an enfiah mek.
The Aizawl Post thudawn danin, Khawzawl district chhunga Sialhawk khuaa loneituten buh natna chikhat ‘blast’ an tih leh pangang puang vanga harsatna an tawh mek bawhzuiin July 18 khan Khawzawl district-a agriculture officer Hmangaihthangi chuan a hmunah tlawhin a enfiah.
Khawzawl ADAO chuan Sialhawka loneitu, tlangram lo nei chhungkaw 70 velin he harsatna hi an tawk tih sawiin, buh thenkhat chu pangangin a eichhe hman a. A tam zawk chu buh natna venna leh rannung thahna hlo hmangin an enkawl nghal a, ven theih a nih a beisei tih a sawi.
Tun dinhmunah khaw dang atangin he harsatna chungchang report an la dawng lo tih a sawi a. Kumtin pangang avanga vaimin chingtuten harsatna an tawh avanga an department an inralrin reng thu leh harsatna tawkten an department atanga damdawi an lak mai thin thu a sawi bawk.