Car-in Berlin-a LGBTQ parade su, pakhat thi, a titu zawng mek

German police chuan Berlin-a LGBTQ parade-naah car khalh luta mi pawng sutnaah pakhat a thi a, tam takin hliam an tuar bawk tih an sawi.
Inrinni zan khan kawng zawh tan atanga darkar eng emaw zat hnu, dar 10:00 (India-a Pathianni zing dar 01:30) velah German khawpuia police kohna an dawng tih an sawi.
Police thupuangtu, Florian Nath-a chuan an hriat chinah car varin khawpui lailia Tiergarten Park, Pride march kalna tur kawng bula thingkung a su zui tih a sawi.
Mi 16-in hliam an tuar a, thenkhat chu nunna atana hlauhawm khawp hliam an nei tih X-ah an tar lang a. Rang taka kawng zawhna chhuahsan turin a telte an ti bawk.
Police chuan park chhung thing tamna lai, parade tawmnaa lirthei tlansan chu chhui chhuah theih an nei em tih an enfiah uluk hle.
Pathianni khaw var hma khan police hian rinhlelh ‘hriat chian’ an nei tawh tih an sawi a, Berlin-a ‘Islam kaihhnawih’ a nih thu Nath-a chuan a sawi.
“A zawn hna hi theihtawp chhuah a ni,” tiin a hming a sawi lo.
German Chancellor Friedrich Merz-a chuan a titute chu hremna na tak pek a tiam a. Interior Minister Alexander Dobrindt nen ‘rawng taka chetna hi a chin chhuaka chhui tur’ a nih thu an sawi tih a tar lang.
Berlin-ah hian Inrinni tuk atang khan Pride parade leh LGBTQ kaihhnawih thil tih tur avangin police officer 2,200 chuang duty dah an ni.
Germany-a Christopher Street Day an tih, Europe-a LGBTQ thlawpna lantirna lian bera tel tur hian khawpui dang atang pawhin mi tam tak an kal.
An hun hman hi zan dar 10:15 velah thil thleng avang hian khawpui chuan hnuai lama Brandenburg Gate-ah tihtawp a ni a, dawhsana band inlan mekte pawh an tawp a. Mipuite chu Tiergarten Park paltlang lova haw tura tih an ni bawk.
He thil thlen hma hian a telte hian muanawm takin khawpuiah hian hun an hmang a, an lâm a, rimawi ring takin an tiri a ni.