Carbon trading leh sawhthing sawngbawl Tourist hip tam theiha rin zingah ‘GenZ’ tel

Mizorama kawng hrang hranga hma la turin ram chhung leh ram pawn company ho an inzuar a. Carbon trading, sawhthing sawngbawl bakah khualzin hipna tur leh thil danga an tih theih leh an inruahman dan Mizoram sawrkar hotute hnenah an sawifiah.
Kumin August 7-a New Delhi Mizoram House-a chief minister Lalduhoma leh BRICS Entrepreneur Alliance (BEA) Global president & CEO Dr Bhaskar Jyoti Sonowal inkawmna kal zelah BEA Team hian Mizoram an rawn tlawh a. Thawhtanni khan chief minister hoin minister leh sawrkar hotu dangte nen an inkawm.
Chief minister chuan carbon trading, sawhthing sawngbawl leh tourism chu Mizoram sawrkarin BEA nena thawhdunna kalpui hmasak a duhna an ni tih a sawi a. BEA lamin chak taka an umzui avanga lawmthu sawiin, ruahmanna an rawn siam chu a tul anga bawhzui tur a ni tih a sawi.
Thutkhawmah hian BEA thawhpui firm leh company hrang hrangin Mizorama hma an lak theihna lai an sawifiah a. Florata Bio Complex, Russia chuan Mizorama thlai tana an bio stimulant siam hman tangkai kawnga hma an lak theihna sawifiahin, Maximeyz-in tourism lama Mizoram phochhuah leh hma an lak theihna an sawifiah. Carbon project developer Jatin Kapur chuan ‘carbon credit’ lama hma lak theihna a sawizau bawk.
Carbon credit chungchangah hian carbon tihtlemna (carbon- removal projects), afforestation & reforestation (ARR), Blue carbon, BECCS leh Biochar sawifiah a ni a. Thingtlangmite tana eizawnna siamsak, carbon leh private investment hmanga sum leh pai tam tham tak Mizorama lakluh a nih theih dan pawh sawi a ni.
Khualzin hip kawngah Mizoram chu Goa, Kerala leh Kashmir ang state hmingthang sa nena inel loin, thil thar hmuhchhuah leh tawn thar (experience -led destination) lamah nasa zawka hma lak a that an ring a. Sum ngah zual (high-net -worth urbanites), corporate & tech lama thawk leh Gen Z khualzin a tam thei ang ber hip luh (target segments) tum zawnga hma lak theih niin an ngai a ni.
Isreal company atangin micro drip irrigation leh climate control green house, drone enable logistics bakah security lama hma an lak theihna an sawi bawk.
Sawhthing sawngbawl leh a hralhna tur market chungchang pawh sawiho niin, international market-a hralh theih dan tur an sawi a ni.
Thutkhawmah hian Horticulture minister C Lalsawivunga, EF&CC minister Lalthansanga, Cooperation minister PC Vanlalruata, Rajya Sabha MP K Laltluangkima, adviser to CM pahnih – Lalmuanpuia Punte leh Dr KC Lalmalsawmzauva bakah a kaihhnawih sawrkar official an tel.