Cardi B-i’n a sum thawhchhuah tam thu sawi

2018-ah a single ‘Money’ a tlangzarh a, rimawi khawvelah a hming a chher nghal a, Cardi B chuan sum a thawk chhuak tam a, a thiante leh chhungte pawh a pui nasa niin a sawi. Speedy Morman interview-ah Cardi B hi dollar maktaduai 80 chuang nei anga an sawi chungchang an sawi chhuak a, Cardi B chuan chutiang zat chu a kal pelhna a rei tawh ni a sawiin, tunah a chiah chawi zat pawhin bung thar a kai tawh niin a sawi.
Cardi B cuan, “Sum chu ka thawk chhuak tam ve alawm. Tam tak a ni. Mahse, a hman lehna lam pawh tam tak a ni ve tho. Chhungte kan tanpui a. Midang ka pui nasa. Ka chawm ka hrai chu ka ti lo, mahse, ka pui ve nasa, ka ]hiante leh ka chhungte pawh ka pui ve nasa alawm,” a ti.
Cardi B hian dinhmun khirh leh harsatna tam tak a lo paltlang ve tawh a, eizawnna lamah pawh sum dapin thawmhnaw tawngchham tak tak haa lam chi (stripper) te hial pawh a lo ni tawh a, chutiang hmun atanga rawn dingchhuak a ni bawk a, khawsak a nawm ve tak deuh hnuah chuan sum hman lamah a insum vak lo a, “Ka dinhmun chhiat lai kha ka hre reng thin, ka vak chhuak ngai vak lo. Miten designer kutchhuak an lei te ka hmu thin. Stripper ka nih lai leh dinmun khirh taka ka awm lai te kha chuan hetiang hi lei ngai lo,” tiin tuna designer kutchhhuak manto tak taka a inthuam thinna chungchang a sawi chhuak bawk.
Kumin hian a album pahnihna tlangzarh a tum a, a single pahnih ‘Like What (Freestyle)’ leh ‘Enough (Miami)’ te a tichhuak tawh a, boruak pawh a nei nghal viau a ni.
Cardi chuan, “Ka han inla reh ve deuh a, tunah chuan social media lamah pawh ka rawn tuan ve leh tan ta…Tawmbo reng theih a ni lo, ka ning tawh lutuk. Ka album tlangzarh atangin kum ruk a ni ve leh reng tawh, chuvangin kumin chu album thar ka tichhuak dawn e,” a ti bawk.