Cardiologist lemin mi pasarih enkawl thi, NRHC-in chhui dawn

Cardiologist lemin mi pasarih enkawl thi, NRHC-in chhui dawn
Madhya Pradesh-a Damoh district-ah missionary damdawi inah cardiologist lem nia hriatin mi a enkawl mi pasarih an thi nia sawi a ni a, National Human Rights Commission (NHRC)-in chhui turin thu a pe nghal tih Pathianni khan thuneituten an sawi.
NHRC hian Damoh-ah hian Thawhtanni atangin camp siamin Nilaini thleng chhui turin an thutchilh dawn tih an member Priyank Kanoongo chuan a sawi.
Tual chhung mi pakhatin NHRC-ah hian complaint a thehlut a, mi pakhat, ‘Dr N John Camm’ inti chuan damdawi inah thawkin ram pana zir chhuak anga insawiin mi a enkawl a ni.
Complait thehluttu hian doctor hi a hming tak chu Narendra Vikramaditya Yadav-a a ni a. United Kingdom-a hriat hlawh tak, Professor John Camm-a hmingin damlote a enkawl a, dik lo taka a enkawl avangin an thih phah niin a sawi a ni.
Mission Hospital hian hemi chungchangah hian engmah sawi an la nei lo.
Zirtawpnia Kanoongo-a’n X-a a tar lanah chuan an hriat theih chinah Damoh-a missionary hospital-ah hian lung lam tha lo nia sawi an enkawlna dik lo avangin mi pasarih an thi tawh niin a sawi.
Complaint thehluhah chuan missionary hospital hi Pradhan Mantri Ayushman Yojana hnuaia din niin sorkar sum pawh dik lo taka hman nia tar lan a ni a. NHRC hian a chhuina tur a tichhuak ta a ni.
“Thu ka pek angin NHRC chuan Damoh hi April 7-9 chhung thutchilhin an chhui dawn a. A tuartu emaw, mi dang pawhin sawi tur an nei a nih chuan investigation team hi Damoh-ah an hmu thei ang,” tiin Kanoongo hian Pathianni khan a tar lang.
Investigation team hian damdawi in hi an zir chiang ang a, complaint thehluha hming langte pawh an be dawn a, heng zingah hian sorkar thuneitute pawh an tel dawn tih a sawi.
Jabalpur Naka-a cheng, complaint thehluttu chuan January leh February inkar khan Damoh-a Mission Hospital-ah hian dik lo leh doctor tak tak ni lovin cardiology department-a a enkawl mi pasarih an thi niin a sawi a ni.
Thla khat leh a chanve liam ta chhung khan ‘Dr N John Camm’ chuan cardiology department-ah hian damlo a enkawl tih a tar lang bawk.
A hma pawhin doctor rinhlelh hi rinhlelhawm takin a lo khawsa tawh thin nia sawiin hmun khatah rei tak pawh a thawk ngai lo niin a sawi bawk.
Damoh Collector Sudhir Kochar-a pawhin complaint an dawn thu leh an chhui tur thu a sawi ve bawk a. An chhuia an hmuh chhuah azirin hmalak zel dan tur pawh hriat a la nih tur thu a sawi.