Eptuten SC-ah Waqf Bill khin let tum

Eptuten SC-ah Waqf Bill khin let tum
India-a eptu party-te chuan tun hnaia rorelna ina pawm tak, Waqf Bill an tih chu Supreme Court-ah an khing dawn tih an sawi.
Waqf Amendment Bill hi Prime Minister Narendra Modi-a kaihhruai sorkar put luh niin ‘insiam that nan leh langtlang zawk a nih theih nana rahbi pawimawh’ tiin an sawi a. Zirtawpni khan parliament-a rorelna in sang zawkah pawm a ni.
Kum 1995-a dan siam hman mek tihdanglamah hian Muslim thil neihte enkawltu (board)-ah Muslim ni lo an tel dawn a ni.
Waqf an tih hi property (bungrua, hmunhma, in leh a dangte) tihna niin tihchet theih leh theih loh pawh a huam a. Hengte hi Muslim-ten sakhaw thila hman tur leh tanpuina atana an pek khawm a ni a. Islam sakhaw danah Waqf property-te hi hralh emaw, mi hlan emaw a theih loh a ni.
Sorkar chuan dan hman lai siam that hian waqf property hmannaa ei rukna leh tih dan pangngai lova enkawlna a veng dawn niin an sawi a. A sawiseltute ve thung chuan India-a sakhaw zuitu tlem zawk, Muslim-te dikna chanvo chhuhsakna niin hman laia an mosque leh hmun dangte pawh mi dang enkawlna hnuaia awm theihna niin an sawi.
Parliament-a ni hnih sawiho a nih chhungin Congress party chuan ‘dan lo thil’ a ti a, an hruaitu, Sonia Gandhi-i chuan ‘rawng taka danpui sawisakna’ a ti hial.
Zirtawpni khan Congress hruaitu, Jairam Ramesh chuan an party hian ‘rei lo teah Supreme Court-ah Waqf (Amendment) Bill, 2024 hi kan khing dawn’ tiin a sawi.
“Modi-a sorkarin mi dangte a nekchepna, a dan behna leh a chet dan hi danpui hmangin kan bei let zel dawn a ni,” tiin X-ah a tar lang.
Tamil Nadu Chief Minister M K Stalin pawhin an party-in Supreme Court-ah khin tumin ruahmanna an siam tih a sawi ve bawk a. An state assembly-ah a hma lawkin he dan siam that tur duh lohna resolution hi an lo pawm tawh bawk a ni.
“Waqf Bill hian Indian Muslim zawng zawngte hnenah ‘India khua leh tui dangte nen inang lo va, in hmun, in dikna hi keini nen a inang lo,’ tiin a hrilh a ni,” tiin All India Trinamool Congress MP Mahua Moitra-i chuan X-ah a tar lang a. “Hei aia zahthlak leh hrehawm nasa a awm lo,” a ti bawk.
Dan thar atana pawm taka sawisel hlawh ber chu neitu nihna chungchang a ni a, hei hian mosque, shrine leh thlanmual tam tak a khawih thei dawn a. Property tam tak hi miin ziah fel pawh awm lem lo leh kum tam tak, thenkhat phei chu kum 100 chuang liam tawha an sakhaw tana an hlan a ni hlawm.
Union Home Minister Amit Shah chuan ‘mi mal tana property lo hmangte pawh hai chhuah phah a ni dawn’ niin a sawi a. “Heng hmuna sum, lo ruk ni char chak thinte chu tlem zawkte tan hman a ni ang,” a ti.
Communist Party of India (Marxist) hruaitu, Subhashini Ali-a erawh chuan sorkar hian Bihar inthlan tur thlirin thil a ti mai zawk niin a sawi thung.
Muslim pawl tam takin an duh lo va. All India Muslim Personal Law Board chuan home minister thil dawi chu Islam dana sakhaw tana inpekna tihchhiatna a nih thu leh property enkawl chu Muslim-te chauh tih tur niin an sawi.
Board hian ‘Muslim-ten dan anga dikna chanvo an neih tihchhiatsakna’ niin an sawi.
Jamaat-e-Islami Hind pawhin ‘sakhaw zalenna leh dikna chanvo inrahbehsakna’ tiin an sawi.
Hetih lai hian Muslim tam tak chuan waqf property-te hmanga ei rukna, ram inluahsak leh enkawl that loh a awm nasa tih an pawm ve tho va. Hetih rual hian dan thar hmang hian India-a Hindu nationalist sorkar hian Muslim property-te nasa zawka a thunun an hlau tho bawk.