Cargo Service Train

Railways minister Ashwini Vaishnaw chuan Cargo Service Train pawh kan service tir nghal ang; kan thlai tharte awlsam takin state pawnah kan phur chhuak zung zung thei tawh dawn a ni, tiin kar kalta Inrinnia PM Modi-a’n Bairabi – Sairang rel kawng thar a hawn tum khan a sawi a.
Railway minister hian Mizoramin thlai a tharchhuah dan hi a rawn hre thuk lutuk lo ang; Mizoram thlai leh thei tharchhuah, ni tina rel hmanga phurh chhuah zut zut tur awm angin a ngai pawh a ni mai thei. Eng pawh ni se, Mizorama thlai leh thei tharchhuahte chu englai pawhin eng zat pawh state pawn lamah awlsam tak leh rang takin a phurh chhuah zung zung theih tawh dawn, a tihna a ni ber.
Kum 2014-ah khatih laia India prime minister thar Narendra Modi-a khan tuna relkawng siamna tur lungphum hi a phum a, kum sawm chuang hnuah amah vekin a hawng leh a; a tihtur chu a hlenchhuak ta.
A lo chhawr tangkaitu tur Mizoram state hian rel kawng a hman theih huna a chhawr tangkai dan turah ruahman lawk eng nge kan lo neih ve? tih hi zawhna a ni awm e.
Tunhma kum 30 vel kaltaa thudik tak ni si fiamthu anga sawi thin a awm a, chu chu “Mizoramah truck full load a lo lut a, phurh let tur nei lovin a body ruak chiah a phur haw leh thin” tih a ni. Driver thenkhat vannei deuh chuan thirchhia leh meihawl etc. phurh let tur an hmu ve thin tho ang; mahse, a tlangpuiin truck full load-a lo lut, a ruaka let leh kha 95% an ni hialin a rinawm.
Mizoram hian state danga phurh tur bungrua, raw material emaw, finished goods emaw kan nei hran lo a, kan neihchhun pawh trcuk trip hnih khatah a zo der ang. Phurh chhuah tur kan neih chhun chu horti/agri products a ni mai.
Mahse, kan tharchhuahte hi Inrinnia kawngsira thutpui tham deuh chauh hi a ni rih mai a, thenawm state atanga lakluh nen kan inhamtang ve hram hram a ni deuh ber.
Thawkkhat lai khan dragon fruit leh lakhuihthei tlem thawnchhuah (truck phur) kan nei ve a, minister flag off nen ropui takin kan thlah liam. Sawi zui tur a awm tawh lo. Chutiang vel chu kan la ni.
Cargo Service Train a awm ta; full load-a lo lut bungraw phur rel hi, a ruakin an tlan haw ri leh rum rum mai dawn tihna em ni ang? |anlakna tur a tam ta e!