Carlos Alcaraz, Medvedev leh Djokovic te an tlang

Tennis inelna lian Grand Slam pali zinga ngaihhlut hlawh ber Wimbledon khelh chhunzawm zel a ni a. Mipa lama player langsar Carlos Alcaraz, Daniil Medvedev leh Novak Djokovic ten semi-final an lut hlawm.
Champion lai Alcaraz hian thawhleh zan khan American Tomy Paul a hmachhawn a, set hloh hmasa mah se harsatna lian tawk zui lovin hnehna a chang. Alcaraz hian Paul lakah bul a tan tha lova, hun pawimawh takah a serve a hum zawh loh vangin set khatna a hloh.
Set hloh hmasa zawk a nih hnuin a insiamtha thuai a, tha taka thochhuakin a khingpui a lehthal chiang hle. Wimbledon hrang pathuma champion thei naupang ber Alcaraz hian game li hloh chungin set hnihna a la zet a. Set thumna leh set linaah awlsam zawkin a chak zui leh a, a khingpui lakah hian 5-7, 6-4, 6-2, 6-2 a hnehna changin semi-final a lut. Semi-final ah World No. 1 hnehtu Jannik Sinner a hmachhawn zui leh dawn.
Alcaraz hmaa fiahna hautak hmachhawn tur Russian Medvedev hian Australian Open champion Jannik Sinner chu quarter-final-ah a hmachhawn a, inkhel hmuhnawm takah hnehna lian a chang. Medvedev hian champion tura rinkai Sinner lakah set a hloh hmasa zet naa set hnih a la zawn thung. Set lina hloh zui leh mah se deciding set-ah tha zetin a inla a, 6 -7, (7-9), 6-4, 7-6 (7-4), 2-6, 6-3 in a chak a, semi-final a inhlangkai. Semi-final ah khingpui hautak Carlos Alcaraz a hmachhawn zui dawn a, final luh tumin tan a khawh ang.
Grand Slam-ah vawi 24 zet champion tawh Novak Djokovic chu quarter-final-a a khingpui tur Alex de Minaur hliam vanga a inhnuhdawh vangin awlsam takin semi-final a lut.