Mizoram Health minister-in health care scheme-ah pawisa pek ngai loin cheng nuai 5 man thleng inenkawl theih tia a sawi chu sawrkar laipui scheme awmsa PMJAY a sawina nge, state sawrkar duan atanga pek tur tih sawifiah turin an phut tih BJP chuan an sawi.
BJP Mizoram thuchhuak chuan, Prime minister Narendra Modi chuan India mipui hriselna ngaipawimawhin, 2018 September 23-a hawn tawh health care scheme – Ayushman Bharat (PMJAY) cheng nuai 3 thleng kum khata bill theih ni thin chu kum khata nuai 5 hman theihin a tisang a, PMJAY kaltlang hian mi tam takin inenkawlna an dawng nasa a, Universal Health Care-in a tum chu a ti hlawhtling mek, tiin a sawi.
Hetihlaia Health minister Pi Lalrinpuii’n ZPM office-a mipui hriat atana health care chungchang a sawi danah ZPM sawrkar hmalakna anga ngaih theih tura mipui thluak a su nia sawiin, PM Ayushman Bharat pawngsualnaah an ngai hial tih a sawi.
‘Mizoram Health minister-in cheng nuai 5 cashless-a inenkawl theihna anmahni duan anga a sawi hi, PM scheme hman lai mek a sawina nge, ZPM sawrkar scheme duan thar tih mipui min hrilh turin kan phut a. Thudik, zirtirna dik leh thutak sawi tura ngaihten an hmingthat duh luat avanga PM scheme anmahni kutkawih ang thawthanga an sawi hi a pawi kan tiin mipui min ngaihnep zia tih lannaah kan ngai a, mahni tuh loh rah seng tum chhen lo turin ZPM sawrkar kan chah a ni,’ BJP Mizoram thuchhuah chuan a ti.
Cashless nuai 5 pekna tur sawifiah turin BJP-in Health minister phut
Get real time updates directly on you device, subscribe now.
Prev Post
Next Post