ZPM-in lungrem chim enfiah

Tunhnaia Reiek RD Block BDO Complex retaining wall (lungrem) siam chim chu ZPM Gen. Hqrs chuan endiktu team siamin Thawhlehni khan a hmunah thil awmdan an zirchiang.
ZPM thuchhuah danin, endiktu team hian Reiek RD Block BDO Lalrinzuali leh office technician-te an kawm a. An lo hrilh danin, he hna hi PMKSY ami, RD department hnuaia ZPM Reiek Unit president Zothansanga hminga thawh a ni tih an sawi a, sanction amount chu Rs.100,000 a ni a, SOR 2019 hmanga estimate siam a ni.
BDO chuan retaining wall chim chhan hi hnathawh chhiat vang a ni lo tih a lo hrilh a. Kumin March 23 khan he hna hi zawhfel a ni a, zawh a nih hnu hian a khat tawkin ruah a sur fo a, lung remna lai hi leivung awmna lai niin, a lei a nghet lo sa hrim hrim a, May 6 khan hi a chim ta tih a sawi. Hnatawh chhiat vangah an ngai lova, vanduai vangah BDO office lam chuan an ngai a, Water Shed Development Fund atangin lungrem chim siamthatna tur an dil sak mek tih an lo sawi a ni.
Hnathawktute pawhin ruahtui tlak vang leh a chhaka water tank siam thar atangin tui a put niin an hria a, he hna leh sum sanction amount hi inmil lo deuh niin an hre bawk tih endiktu lam hi an lo hrilh a. Hnatlanga siamthat leh an tum laiin, BDO-in Water Shed Development Fund atanga a siamthatna tur a lo ngaihtuah sak chu an lawm hle tih an sawi a ni.
‘Endiktute hmuh dan chuan, he hna hi SOR 2019 hmanga estimate siam a ni hi tha lo an ti a; dan thar anga 33.03% belh ni se chuan, lungrem hi a thuahin a rem theih dawn a, retaining wall feet 28-a sei, feet 12-a sang rem nan chuan estimate hi a leilung awmdan enin a tlem deuh niin an ngai. Budget mila hna thawh a ngaih avangin a thuaha rem a ni loa, hei vang hian lungrem hi a chak tawk lo niin an hria a, estimate siam dan hi ennawn turin department hotute hnenah pawh thlen an tum a ni,’ ZPM thuchhuah chuan a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More