Catholic hruaituten FCRA hnuhkir an ngen Kristiante tinzawna he bill hi duan a ni lo: – Union Home minister

On Jul 13, 2026 1 0

India rama Catholic kohhran thuneitu sang chuan Union Home minister Amit Shah hmu in Foreign Contribution Regulation Act hnukkir leh turin an ngen a. Minister hian Parliament thukhawm hunah sawiho tura chhawpchhuah tum a nih thu a lo hrilh.
Catholic Bishop’s Conference of India (CBCI) aiawhte chuian Union Home minister hi Delhi-ah an hmu a. Memorandum – Foreign Contribution Regulation Act, sakhaw zalenna chungchang leh Manipur buaina chungchang an thehlut. Home minister hi Home secretary Govind Mohan leh official dangten an tawiawm.
Foreign Contribution Regulation Act (FCRA) chu Kristian bik tinzawnna a ni lo tih Amit Shah hian lo hrilhin, kum kaltaah FCRA hmangin cheng vaibelchhe 17000 vel hmuh a ni a, chumi atanga vbch. 3000 vel, a pumpui atanga zaa 13 vel chauh Christian organisation tana lo lut a ni tih a sawi.
Kum 2010-a bill siam tawh chu anti national activities atana hman a nih lohna atante, a nihna tur ang taka hman a nih theihnan he dan hi siamthat tum a nih thu lo hrilhin, kohhran leh a hnuaia hmalakna peng hrang hrang bakah sakhaw dang he foreign contribution hmang tangkaitu emaw eng pawl emaw bitum bik an awm lo tih a sawi a. Kristian pawl hrang hrangten kum tam tak India hmasawnna atan an hnathawh a hriatpui tih a sawi a ni.
CBCI-in FCRA Bill hnukkir tura an ngenna chu Parliament Monsoon Session-ah sawiho tura chhawpchhuah tum a ni tih a lo hrilh a. Foreign contribution kaltlanga infrastructure leh thil dang dang din tawhte sawrkarin chhuhsak a tumna lam a ni lo tih a sawi.
Kristiante nekchepna reng rengah FIR thehluh thin turin Union Home minister hian thu a lo rawn a. FIR ngaihsak loh, hmalakna awm lo leh duhkhawp lohna a awm a nih chuan Ministry of Home Affairs-ah thlenin, mimal taka a lo bawhzui thin tur thu a sawi a ni.
Kristian pawl hrang hrang FCRA avanga an sum hmuhna tihtawp sak leh harsatna an tawh zawng zawng lakhawm a, ziaka a hnena thehlut tura chahin, Ministry of Home Affairs-in lo enzui a tiam tih a sawi bawk.
CBCI aiawhten Home minister Amit Shah an hmuhna turah hian CBCI official advisor Jonathan Lalremruata chuan ruahmanna siamin a tul angin rem a ruatpui a ni.