Leimin thei laka fimkhur turin inchah thar

Ruahtui tlak tam lai a nih avangin mitin sahimna atan Aizawl district mipui chu leimin thei laka inveng fimkhur tur leh hmun him loa puan ho paltlang tum rih lo turin district thuneituten mipui an ngen.
District Disaster Management Authority Aizawl chairman, bawrhsap Er Lalhriatpuii chuan mipui hriat tur thu tichhuakin, tuhnai ruahsur nasa leh fur intan chhoah Aizawl district hmun hrang hrangah leimin, lung tla, retaining wall chim leh chhiatna thleng dang a awm avangin district mipui fimkhur tur leh kan him tlan zawkna atana thu an chhuah zawm theuh turin mitin an inhriattir tih a sawi a. Veng/ khaw tina Village /Local Level Disaster Management Committee pawh mahni veng/ khua theuhah a tul anga hma la tura ngen leh hriattir an ni tih a sawi.
Leimin hlauhawm lai ruahtui tlak lai hi chuan a tul anga khuh hul turin mipui an hriattir a. In tinin tuiluankawr /tui chhe paihna mumal taka siama tifai tur leh, septic tank /soak pit leak awm leh awm loh enfiah a, a lo awm a nih chuan a rang lama thawmtha turin a ti.
Thing leh mau, thli leh ruahin a tih tluk mai theih, chenna in leh electric wire delh mai thei chu a ram neituten Forest department berawnin kih/ zar thlak tur a ti.
‘Ruahsur nasat laiin tui hmun leh kawr hnaiah kal loh tur a ni a. Leimin /lung tlak theihna zawna kawng hmangtu lirthei leh kea kalte fimkhur tur a ni. Sawrkarin hmun him lo a tih, kaltlang phal loh hmunah tumah kaltlang luih loh tur a ni,’ a ti.
Lungrem chim mai hlauhawm leh tui dawng tam zawna awm leh a thlang kawng hmangtute fimkhur tura hrilhin, mimal ram chhunga leimin veng thei tur chi hnim sam fai rih loin, leimin venna atan mimal ram awlah thing, a zung lei ti nghet thei chi phun uar turin a ti bawk.