CBI-a general consent pek danah Congress-in ZPM debate pui huam

ZPM sawrkarin CBI hnena general consent a pek dana ZPM Legal department-in a sawifiahna chu tanchhan tak tak awm loa insawi thiam tumna a ni tih Congress senior vice president Lalnunmawia Chuaungo chuan a sawi a. ZPM-in an cho a nih chuan public debate neihpui an hnial lo tih a sawi.MPCC hian chief minister a nih hma leh nih hnua Pu Lalduhoma’n CBI hnena general consent an pek dan tur a sawi ang ngeia consent pe tha leh tura ngenna hi Nilaini khan chief minister office-ah an thehlut a. MPCC senior vice president chuan, chief minister hian Mizorama corruption a nasat thu leh chumi dona atan CBI an koh luh tur thu mipui hmaah vawi duai lo a sawi tawh a. 2023 December 14-a Assembly House-a larsap thusawi sawihonaah pawh “..kan sawrkar kaltaah khan Lokayukta-in CBI hnena pek a rawt pathum kan sawrkara thehluh sawrkarin a lo dang chat a, pek a phal lo kha a ni a. Keini chuan general consent kan pe dawn a. Engmah phalna min dil min dil a ngai dawn lo. An kuta thu lut chu an investigate mai dawn a ni,” tia a sawi thu a sawichhawng.
“Heta case pathum a sawi hi central sawrkar hnuaia thawkte niloin Mizoram sawrkar hnuaia thawkte chungchang a ni a. A thusawiah hian state hnuaia thawkte chhui lam a sawi tih phat rual a ni lo,” a ti a. Chu chu mipui rilru in a tinzawn pawh a ni tih a sawi.
ZPM sawrkar hlim, 2023 December 28 khan gazette notification tichhuakin, CBI-in Mizorama investigation an tih theih nan phalna (general consent) pek a ni a. He notification, Section 6 of the Delhi Special Police Establishment Act 1946 behchhana chhuahah hian central leh state sawrkar hnathawkte thliar loin chhui phalna (general consent) pek a ni a. Mizoramah state sawrkar phalna a hrana lak ngai loin, central leh state sawrkar hnuaia thawkte chhui phalna, power leh jurisdiction chu CBI pek a ni ta tihna a ni tih Lalnunmawia Chuaungo hian a sawi. Hei hi Assembly House-a CM thusawi nen pawh a inmil thlap tih a sawi a ni.
Criminal law hnuaia dan thar hman hnu ah CBI director atanga lehkha hmuh chhuanlamin, July 1 khan CBI consent pek danah gazette notification thar tih chhuah a ni a, a hmaa notification chu awmze nei loah a rawn siam ta tih a sawi bawk.
ZPM Legal department-in general consent pek dan sawifiah an tum chu chhuanlam, inphat mar tumna mai a ni tih Congress hruaitu hian sawiin, “CBI director-in state hrang hrang chief secretary-te hnena a thawn hi chu general mai a ni a; ZPM hian sawifiah ngial tum mah se, thudik lo mipui fah an tum avangin an hlawhchham a ni,” a ti.
Central hnuaia thawk bakah Mizoram Lokayukta-in rawtna a siam phawt chuan Mizoram sawrkar hnuaia thawk, state sawrkar phalna a hranpaa lak kher ngai loa chhui thei tura CBI hnena consent pekna gazette notification chhuah turin chief minister an ngen tih a sawi a. Draft gazette notification pawh an thehlut nghal a ni. Central-a BJP sawrkarin central agency-te a hmansual thin dan thlir tel chungin, hetiang laka inveng tho in, mipui beisei angin a tih theih tih an ‘draft’ ah hian an telh tih a sawi a ni.