Celtics in final an hnaih

Pathianni zing khan NBA Conference play-off semi-final khelh chhunzawm a ni a, Eastern Conference final ah Boston Celtics chuan hnehna chang nawn lehin, series ah 3-0 in hma an hruai a, NBA final an hnaih tawh hle. Western Conference lamah Dallas Mavericks chuan Minnesota Timberwolves lakah 2-0 in hma an hruai ve mek bawk.
Final game hmasa pahniha hnehna chang zawn tawh Boston Celtics hian an khingpui Indiana Pacers hneh nawn leh ngei tumin tan an khawh a. Pacers in hnehna chan ve tawh ngei tumin tan an lo khawh bawk nen inkhel hmuhnawm tak an lantir. Final game thumna quarter hmasa berah an inhnehtawk nghal hle a, Celtics hian point 32 thawkchhuak in, point khatin an chungnung. Quarter khatnaah an inhnehtawk viau hnuin quarter hnihnaah Indiana Pacers an khel tha ta viau thung a, point 13 zetin an chungnung a, point 12 a hmahruai chungin chawlhlawk an hmang.
Chawlhlawk hnu lamah Celtics in an khingpuite lehthal ngei tumin tan an khawh a, quarter thumnaah point thumin an chungnung a, an inkar an tizim. An inkar tizim hret mah se point 10 zetin an la hnufual tho thung a, chak turin fiahna hautak an hmachhawn zui a ngai. Quarter hnuhnung berah chak ngei tuma tan khawh Celtics hi point 12 zetin an chungnung zui leh a, inkhel hmuhnawm takah 114-111 a hnehna chang hramin NBA final an hnaih leh zual. Eastern Conference final khelh hmabak game li la awmah Celtics hian tlang turin vawi khat chak chiah an mamawh tawh a, NBA final lut turin an dinhmun a tha hle.
A game thum nan Indiana Pacers an hneh tum hian Celtics tan Jayson Tatum chuan point 36 a thawkchhuak a, ball sawhlet vawi 10 a dawn bakah assist vawi riat a nei bawk a. Celtics tan hian Jaylen Brown chuan point 24 a thawkchhuak ve bawk.
Inrinni zinga Eastern Conference final game hnihna khelhah Dallas Mavericks chuan Minnesota Timberwolves an hneh nawn leh a, series ah 2-0 a hmahruaiin NBA final an hnaih ve zel bawk.