Central-in Manipur buaina a enliam reng chhan ka zawt – C Lalrinsanga

Minister C Lalrinsanga chuan eng vanga Manipur buaina chu sawrkar laipuiin a enliam reng chhan a zawt tih a sawi
Inrinnia Mizo Hnam Run Lungleia hun hmanah MNF adviser ni bawk C Lalrinsanga chuan Mizote chu kan pipute culture atangin thianghlim taka kal thin kan ni a. Kan ramah Pathian thu a lo luh hmain culture tha tak nei kan ni, tia sawiin, “Central sawrkarin lo hria se ka duh chu, engati nge kan Mizo pui, kan Kristian pui Manipura kan unaute buaina hi a enliam reng tih ka zawt a. Rawn ngaihsak thuai rawh se tiin ka ngen a ni. Mizote hi a tul hunah chuan India sawrkar pawh lo do reng tawh, central chala chil hnawm ngam hnam kan lo ni tawh tih hi ka sawi nawn a ni,” a ti.
MNF nih chu a namai loa, Zoram leh hnam tana din a ni tih a sawi. Falu hloh mai niloin, zum leh hriam karah kal hmasaten nasa takin an lo bei tawh a, tuipui leh khawmualah ruang hlawm loha kalsanin ram tan an lo bei nasa tawh hle tih a sawi. MNF chu Pathianin a mite kaltlanga a din a nih thu sawiin, economics independent chu reiloteah kan la kalpui thuai anga, nakinah chuan Zofate chu rorelna pakhat hnuaia kan awm hun ala awm ngei a beisei tlat tih a sawi a ni.
MNF leh Congress te angin ZPM chuan ruhrel leh mawngkhal a nei ve lo tih MNF hruaitu hian a sawi a. Congress pawh chhe viau angin lang mah se, ruhrel tlem azawng an la nei a. Ruhrel chu tisa in a tuam phui loh chuan engtih na mah a ni lo thung, tiin, MNF chu ruhrel lian tak, tisain phui tha taka a tuam mek tih a sawi.
Agriculture minister C Lalrinsanga hian Inrinni zing khan Lunglei Rahsi Venga YMA building cum market shed a hawng a. He building hi YMA leh sawrkar tangrualin a tul apianga mipui tana chhawr theih tura an sak a ni. RKVY hnuai atanga sum, nuai 15 vel a pawhchhuah atanga sak, market shed ni tura ruahman a ni tih a sawi.