Vairengte College hawng thar

Vairengte College hawn thar chu July 7 khan Serlui bialtu MLA Lalrinsanga Ralte chuan hawng. July- December 2023 chhunga college-a thawkte hlawh tur chu bialtu MLA hian a pe nghal.
MLA Lalrinsanga Ralte chuan Mizorama college-te chu a tirah chuan khawtlang hruaitu leh mipui tangrualin an din atanga bul tan chhoh a ni thin tih sawiin, Vairengte khawtlang hruaitu leh mipui tanrualna avangin Vairengte ah pawh college thar hawn a ni thei ta chu lawmawm a tih thu a sawi. Hlawh neih loh avanga college a tawp ai chuan a tam thei ang ber Fund-ah a dah tur thu leh MLA-a thlantlin leh a nih chuan kumtin cheng nuai 10 aia tlem lo college enkawlna atan MLA Fund atanga a dah ziah tur thu a sawi a ni.
Vairengte College hi kumin academic session atanga tan nghal niin, Govt. Saitual College principal pension ta Dr Lalsiamhnuna chu principal a ni. Teaching faculty paruk leh LDC pakhat an awm mek. Kumin July – December chhunga Vairengte College-a thawktute hlawh tur hi bialtu MLA hian tumsakin computer full set a pe bawk. College hi evening shift-a kalpui phawt tur niin, subject paruk – Education, Economics, History, English, Mizo leh Political Science a bul tan a ni a, college hmun tur hi Vairengte VC-II chuan ram pe in, college building an la neih hma chu Vairengte High School-ah class an kal rih dawn a ni.