Central scheme kalpui dan thlirho

District Development Coordination and Monitoring Committee (DISHA) Lunglei chu an chairman, Lok Sabha MP C Lalrosanga kaihhruaiin Thawhlehni khan an thukhawm a. An district huamchhunga sawrkar laipui scheme kalpui mek zirchiangin, hmalak tulte ngaihtuah ho a ni.
Information technology lamah hma kan sawn a tul hle tih DISHA chairman hian sawiin, hemi kawngah hian department tinte hma sawn zel turin a chah. Lunglei district-a sawrkar department hotute chu scheme an tih hlawhtlinnaa harsatna an tawhte leh sawrkar laipuia thlen sak leh bawhzui tulte report hreh lo turin a chah bawk.
Thutkhawma report danin, kum 2022- 2023 chhungin Lunglei district-ah MGNREGS job card nei account-ah cheng nuai 6591.33 thun a ni a. MGNREGS hnuaiah hna chi hrang hrang 2238 thawh zawh niin, thawh mek 489 a awm a ni. Aadhaar seeding pawh zawhfel tep niin zaa 99.62 zawh tawh a ni.
PWD Division pathum – PWD Tlabung Division, PWD Lunglei Road Division I leh PWD Lunglei Road Division II hnuaia PMGSY kawng siam hna 30 awm zingah tunah 13 zawh tawh niin, hna 17 thawh mek a ni.
Khawpuia miretheite in sak tanpuina PMAY (U) hnuaiah1st phase-ah beneficiary 874 awmin 624 in an zo tawh a; 2nd phase-ah beneficiary 637 hnenah 1st instalment pek a ni tawh. Tlabungah beneficiary 592 thlan niin 584-in 1st instalment an dawng tawh a, 170-in 2nd instalment an dawng tawh. Swachh Bharat Mission (Urban) hnuaiah chhungkaw 1335 te ek in (individual household latrine) sak tanpuina pek an ni tawh a ni.
Kum upa pension, IGNOAPS hnuaiah Lunglei district-ah beneficiary 5111 an awm mek a, widow pension scheme hnuaiah beneficiary 376 awmin, pianphunga rualbanlo beneficiary 143 an awm bawk. Mid Day Meal hnuaiah school 438 atangin zirlai 22951 beneficiary an awm a. ICDS hnuaiah Lunglei district-ah Anganwadi 418 awmin beneficiary 17346 an awm a ni. Kum 2022- 2023 chhungin PMEGP loan mi 76 hnenah cheng nuai 666.40 pek chuah a ni.
Thutkhawmah hian Lunglei district-a MLA atangin Lunglei South bialtu MLA Dr K Pachhunga chiah a tel a ni.