Central sorkar-in Minimum Support Price bithliah thar

Nilaini kal ta khan central sorkar chuan thlasik-a chin chi thlai chi ruk (Rabi Crops) te lak atangin Minimum Support Price (heng thlai sorkarin a lei sakna man hniam ber tura bituk sak) chu ti sangin wheat chu quintal khat zelah Rs. 150-a ti sangin tun dinhmunah quintal khat Rs. 2,125 chu Rs. 2,275-in a ti sang a, hei hi nakum April 2024 – 25 atanga hman tan tur a ni. He MSP rate thar hi wheat dek chhuaktu lian ber ber Madhya Pradesh leh Rajasthan state ten kan hma lawka State Assembly Election an hmachhawn tur thlir pah chunga tih niin kum 2014 atanga BJP-in rorelna an chan hnua MSP an tih san ber tum a la ni. MSP lo tih san tawh dan data enin kum 2014 – 15 atanga 2023 -24 chhung khan wheat man chu quintal khat zelah Rs.40 atangin Rs.110 a sang chho a ni.
Cabinet Committe on Economic Affairs (CCEA) chuan he MSP hi a pawmpui tawh a, he MSP lo sang chho hian pulses, mustard leh oilseeds ah te nghawng nei chho ve zel in MSP man san ber tum quintal khat zel ah Rs.425 leh Rs.200 tein a sang chho ve nghal a ni. Gram, barley leh safflower te hi thlasik thlaite zinga MSP lo tih san tawh te an ni a, heng MSP tih san te hi kum 2018 – 19 budget-in a lo tiam tawh zulzuia tih san an ni. Safflower chu quintal khat zelah Rs.3,000 atangin Rs.5,800, rapeseeds (oilseeds) leh mustard chu quintal khat zelah 3,050 atangin Rs.5,650 ah leh gram chu quintal khat zelah Rs.3,100 atangin Rs.5,440 ah te tih san chhoh a ni.