Centre-in ASF leng la ngaihven lo

Mizoramah a thawh thumna atan vawk pul hri – African Swine Fever a leng mek a, state sawrkarin a hriattir tawh hnu ah sawrkar laipui atangin official-a rawn ngaihven a la ni lo.Kum 2021 a vawikhatna atan Mizoramah ASF a leng a, he natna thihpui 33417 awmin, he natna kai/ kai ngei nia hriat avanga vawk suat/ tih hlum 12568 an awm. Kum 2022 khan a thawh hnihna lengin he natna thihpui vawk 12568 leh suat 11594 an awm a. Kum hnih chhunga ASF vanga vawk thi hrim hrim hi 70147 a ni.
Kum 2023 khan kumtawp lamah ASF hi a leng leh a; vawk 1039-in thihpuiin 928 suat a ni. Nikuma leng hi a thawh thumna anga chhiar a ni lem lo thung a; a kar a inhlat loh avangin a thawh thumna bultanna anga ngaih theih a ni lek lek zawk tih sawi a ni
Chutihlaiin a thawh thumna leng mek hi kumin January atanga chhiar tan a ni a; July 12 thleng khan he natna thihpui vawk 5688 an awm a, he natna kai nia hriat vawk 10853 tih hlum an ni tawh. District 8-a khaw 165 a tuam tawh a ni. A thawh thumna hi he natna thihpui nghal aia suat an tam zawk vawikhatna a ni.
Thudawn danin ASF leng thawhkhatnaah hian vawk thi neitu, sawrkar laipui atanga tanpuina dawng chhungkaw 2488 an awm a; amaherawh chu, he natna thihpui vawk vulhtute chhawmdawl theih an ni loa, vawk suat te chauh a huam thei a ni. Mizoram sawrkar chuan ‘compensation’ ni loin, ‘rehabilitation’ zawnga kalpuiin chhawmdawlna hi centre-ah a dil a, kum 2022 ami leh 2023 a vawk vulhtute chhawmdawlna hi la bawhzui mek zel a ni.
Tuna leng mekah hian July 7 khan chief minister Lalduhoma chuan Minister of State for Animal Husbandry George Kurian hnenah harsatna tawh mek leh tanpuina mamawh dan a sawipui tawh a; tun thlengin department lam chuan ministry atanga official-a rawn ngaihvenna a la dawng lo tih thu dawn a ni.