Centre-in Mizoram leh Manipur tan pawtsei

Union Ministry of Home Affairs chuan Manipur sorkarin an State-a illegal immigrant-te record kimchang a siam theihna tur hun a pek chu a pawhsei sak a. September 30 chu hun tawp a nih laiin thlaruk dang atan March 31, 2024 thlengin a pawhsei sak a ni.
Ministry chuan Manipur sorkar chu kumin financial year tawp thlengin ‘illegal immigrant-te biographic leh biometric details’ lak theihna hun a pawhsei sak a. Biometrics tih hian retina, iris leh fingerprint-te a tel vek a ni. June 22 khan Ministry chuan Manipur leh Mizoramte chu September 30, 2023 hmaa zo fel turin a lo hriattir tawh a.
Manipur sorkar chuan tuna buaina Meitei leh tribal Kuki-Zo community te inkara May 3 atanga chhuak mek leh la kal zel awmna chhanah undocumented immigrant-te chu a chhan nia a sawi zinga tel a ni.
Kum 2021 February thla atang khan Kuki-Chin-Zo ethnic group sang tam takte chuan Myanmar atangin Mizoram leh Manipur an lut tia sawi niin Mizoram-ah chuan undocumented migrant hi 40,000 vel an awm tia sawi a ni.
April 28 daih tawh khan Manipur ethnic violence chhuah hmain Union Home Secretary Ajay Kumar Bhalla chuan Myanmar nena inri state pahniha illegal immigrant-te chhinchhiahna kalpui tur chungchangah meeting a neihpui tawh a ni.
Manipur Chief Secretary hnena MHA-in lehkha a thawnah illegal immigrant-te chhinchhiahna kalpui chu September 30 a tawp tur chu March 31, 2024 thlenga pawhsei a nih thu a hriattir a ni.