CEO-in a fapa kum 4 mi thata puhin hren mekin awm

Start-up company-a chief executive officer kum 39-a upa hmeichhia chu Goa-a a fapa kum li mi lek thata, chumi hnuah a ruang chu thenawm Karnataka state panpuia puh a ni.
Goa police-te chuan accused Suchana Seth chu January 8 khan Chitradurga, Karnataka-ah an man a, eng vanga a fapa that ngawt nge a nih hriat theih a la ni lo.
Seth LinkedIn page ah chuan Startup Mindful AI Lab Chief Executive Officer (CEO) tiin a intarlang a. Top ‘100 Brilliant Women in AI Ethics for 2021’ ah pawh lang pha a ni.
January 6 khan a fapa nen north Goa-a Candolim a rented service apartment-ah an thleng niin Calangute police station inspector Paresh Naik chuan a sawi.
Ni hnih an cham hnuah apartment staff te hnenah chuan Bengaluru ah hna thila a kal a ngaih avangin taxi ngaihtuahsak turin a ti a.
“Staff ten Benglauru flight in pan mai la, taxi lak aiin a tlawm zawk ti pawhin thurawn an pe a ni,” tiin Naik chuan a sawi a.
Mahse Suchana Seth chuan taxi a kal a duh zawk thu sawiin January 8 zing lamah an kal ta a ni tih a ni. A hnuah apartment chu staff ten tifai tura an luhin towel-ah thisen an hmu a ni tiin Naik chuan a sawi.
“Apartment management te chuan Calangute police hrilh nghalin, kan kalchilh zui nghal a,” tiin a sawi a.
Staff te chuan hmeichhia fapa kum li chu apartment an chhuahsan laiin an hmuh loh thu sawi bawkin bag lian tak a keng tel bawk an ti a.
Police-te chuan Suchana Seth chu biain thisen an hmuh thu leh khawiah nge a fapa tiin an zawt zui a. “Suchana Seth chuan thisen chu a period lai a nih thu a sawi a. A fapa chu Margao (south Goa) ah a thiante hnenah a awm tia hrilhin an address pawh a pe zui nghal a ni,” tiin official te chuan an sawi.
Police te chuan Margao bula Fatorda police te be vatin Suchana Seth address pek chu a lem tih an hrechhuak zui a.
Inspector Naik chuan Suchana Seth phurtu taxi driver chu Konkani tawnga biain Karnataka a Chitradurga district an thleng hman tawh a, police station hnai ber pan turin a hrilh ta a ni.
Chitradurga district-a Hiriyur taluk a Ayamangala Police te chuan Goa police te ngenna angin Thawhtanni tlai khan an lo man ta a ni.
Dharmender Kumar Meena, Chitradurga SP chuan taxi driver chuan goa police te hrilh angin Ayamangala police station a rawn luhpui a ti a. “Kan man zui nghal a. Goa police te ngenna angin vehicle kan enfiah nghal a, naupang ruang chu kan hmu zui ta a ni. Goa police te lo thlen hma chuan kan lo kawl rih a ni,” tiin a sawi.
Suchana Seth hi a pasal Indonesia-a awm mek Venkat Raman nena inthen tum mek a, tihfel ngai tifel zo tep tawh dinhmuna an awm lai a ni.