CEO-in vote a tlak that beisei

Mizoram chu ziak leh chhiar thiam tamna ram a nih angin vote thlak ngaihpawimawh kawngah state dang aiin beisei a sang tih chief electoral officer Mizoram Madhup Vyas chuan a sawi.
Kumina MLA inthlanpui neih tur inpuahchahna endikin CEO hian Nilaini khan Lawngtlai district a tlawh a. Inthlanna kalpui tura mawhphurhna neitute kawmin political party aiawh leh tlawmngai pawl hruaitute a kawm. EVM dahthatna hmun Strong Room leh polling station thenkhat a endik bawk.
CEO chuan voter za zela 83 aia tlem loin vote an thlak theih nan inthlan kalpui nana mawhphurna neite chuan an hna a hun taka an hlenchhuah theih nan theihtawp chhuah turin a chah a. Vote thlak ngaipawimawh tura inzirtirna, Systemic Voter Education & Electoral Participation (SVEEP) chu mipui tam zawk huap tura hma lak a pawimawh tih sawiin, returning officer leh assistant returning officer-ten an mawhphurhna an hriatchian theih nan ECI inkaihhruaina bu chhiar tam turin a chah.
Polling station tinah inthlan hma ni thum chhungin duty leh vote thlak turte mamawh zualpui, eng chhit, tui intur, inthiarna leh kailawn ruahman fel vek tur a ni, tiin, thawh hona tha tak hnuaiah inthlan hlawhtling tak kalpui a nih theih nan duhsakna a hlan a ni.
Lawngtlai district election officer H Lalhmingthanga chuan an district dinhmun, electoral roll ennawnna kalpui dan, polling station ruahman dan leh inthlan kalpuina tura inpuahchahna tlangpui chu CEO hi a lo hrilhfiah a ni.