Congress hi Zoram mipui innghahna – MPCC treasurer

BJP thil tum a hlawhtlin lohna turin Congress party chu Zoram mipui innghahna awmchhun an ni tih an party treasurer Dr Lalmalsawma Nghaka chuan a sawi.
Nilainia Aizawl South-II Block Congress Committtee Worker’s Meet a hmanpuinaah MPCC treasurer chuan Congress sawrkar a din a ngai tih sawiin, “Kan ramah ruihhlo a hluar em em a, ruihhlo tawlhna kawngpui kan ni mek. Kan sawrkar sum harsatna avangin sumdawngten an tuar mek a, kan ram kawngpui a chhiat avangin transporter-ten rawn kal an hreh em em a, kan ram dinhmun hi a chhe hle. BJP-in thenawm state te an la mek a, keini hi an hmabak kan nih avangin Congress sawrkar kan din a ngai,” a ti.
An party chu Pathian hruai theih an nih a ngai a, an tu leh fate awmna tlaka an siam a ngai a; tuna an kalphung angah hi chuan an tu leh fate chan tur ngaihtuah ngam a ni loa, an harh a ngai, tiin Dr Lalmalsawma Nghaka hian a sawi. “BJP thiltum a hlawhtlin loh nana hma la thei awmchhun party chu Congress chauh hi a ni a, Mizoram mipui innghahna kan ni. Pathian hnenah kan tawngtai anga, ram mipui rawngbawl turin Pathianin min chhawp chhuak ngei ang,” a ti.
Mi tam takin dinhmun chhe zawkte chawikanna hmalakna an sawisel thin tih a sawi a. Mi tamtak tanpui mamawh ngawih ngawihte tanpui chu Congress sawrkarin a ngaipawimawh hle zawk tih a sawi. “Congress party ngaihpawimawh chu mipui an ni a, chuvangin Referal Hospital-te kan din a, medical college te kan din a ni,” a ti.