Chak chungin Atletico Madrid an tla

Thawhtan zing lam khan Fifa Club World Cup 2025 khelh chhunzawm a ni a, La Liga club lian Atletico Madrid chuan Botafogo hneh bawk mah se last 16 lut zo lovin an tla. Atletico Madrid an tlak lai hian champions league champion Paris St Germain chu group champion niin an tlang ve thung.
Atletico Madrid hian Lumen Field, Seattle-ah vawi hnih chak a, point ruk hmu tawh Botafogo an hmachhawn. Chak an mamawhna inkhel pawimawh takah chak ta mah se Brazil club lakah point thum an hmuh hi an tan damna a tling zo lo va, tling teuh apiang pawi tizualtu-ah a chang hlauh thung. Inkhel hmuhnawm takah hian hun rei tak chhung goal lut a awm thei lo va, team hnihte chak tumin an innawr tawn nasa hle. Hun rei tak chhung goal lut a awm theih loh hnuin Atletico Madrid tan Antoine Griezmann chuan minute 87-naah hma hruaina goal a thun, Griezmann goal thun hi Botafogo lakah an chakpui a, point thum hlu tak an hmu.
Group B-a inkhel dangah European champion Seattle Sounders FC chu si hnih faiin an lo hneh ve thung. PSG hian an group a point la hmu lo awmchhun Seattle Sounders FC hi an ngam viau a, inkhelh tan atanga a tawp thlengin an awp bet tluan. PSG hian khel tha viau mah se goal erawh beisei angin an thun hma thei lo thung. Darkar chanve chhunga goal lut a awm theih loh hnuin French champion tan Khvicha Kvaratskhelia chuan minute 35-naah hmahruaina goal a thun a, si khat faia hmahruai chungin chawlhlawk an hmang.
Chawlhlawk hnu lamah PSG an khel tha chhunzawm a, goal pawh an thun leh thuai. Season kal meka khel tha tak Achraf Hakimi chuan minute 66-naah goal thunin an hmahruaina a tizau. Hakimi goal thun hnu hian goal dang a luh belh thei tawh lova, PSG in si hnih faia hnehna changin point thum hlu tak an hmu.
Group B-ah hian Paris St Germain, Botafogo leh Atletico Madrid ten point ruk theuh an hmu a, an inel tawk hlawm hle. Point ruk hmu zingah PSG chu goal difference-a tha ber niin +5 a ni a, group champion niin last 16 an lut. Goal difference-ah Brazil club Botafogo chu +1 an ni a, an group-ah pahnihna ni chungin last 16 an lut. Hetihlai hian goal difference-ah -1 Atletico Madrid chu uiawm takin an tla a. Khelh thum atanga point hmu miah lo Seattle Sounders FC nen Fifa Club World Cup atangin an puanthuah an tel a, an tla hang nalh.
Inter Miami leh Palmeiras an tlang
Thawhleh zing lama inkhel dang, Group A a mite inkhelah chak an awm thei lo va, team pali te an inhnehtawk vek. An match hnuhnung berah chak zo lo vek mah se Lionel Messi khelhna Inter Miami leh Brazil club lian Palmeiras ten last 16 an lut.
USA in inelna a thlen vangin Fifa Club World Cup 2025-a inlan Inter Miami hian Hard Rock Stadium-ah Brazil club lian Palmeiras an hmachhawn. Inter hian si hnih faia an hmahruaina an humhim zo lova, uiawm takin group champion an ni zo lo. Group champion an nih zawh loh vangin Inter Miami hian European champion PSG an hmachhawn a ngaih phah dawn. Lionel Messi-a’n a club hlui PSG a hmachhawn tur hian ngaihven a hlawh nghal hle.
Point li hmu tawh Inter Miami hian point li hmu ve mek Palmeiras lakah bul an tan tha a, Tadeo Allende chuan minute 16-na lekah hmahruaina goal a thun nghal. Hma taka goal an thun hnuin goal lut a awm belh thei lo vang vang a, minute 65-na daihah Luis Suárez chuan an goal hnihna thunin, an hmahruaina a tizau. Si hnih faia hma an hruai vangin an chak zui mai a rinawm viau a, group champion ni turin an di
nhmun a tha hman hle.
Si hnih phur reng mah se hun tawp dawn hnaih lamah Palmeiras an khel tha hle a, goal hnih thunin tlawm an pumpelh ta hial. Palmeiras tan hian Paulinho chuan minute 80-naah goal thunin an si phurh a sut then a. Minute sarih hnu lekah Mauricio chuan goal thunin an si phurh a sut zo zui leh zat. Mauricio goal thun hnu hian goal dang a luh belh thei tawh lova, inkhel hmuhnawm tak chu 2-2 in a tawp.
Group A-a inkhel dangah FC Porto leh Al Ahly e 4-4 in an lo inhnehtawk ve bawk. Porto lakah hian Al-Ahly tan Wessam Abou Ali chuan goal thum thunin hattrick a siam a, Mohamed Ali Ben Romdhane chuan goal khat a thun ve bawk. Al-Ahly lakah tlawm ngei tura ngaih an nih tawh laiin Porto tan Rodrigo Mora, William Gomes, Samu Aghehowa leh Pepê ten goal thunin an si phurh an sut zo thei hram a, tlawm pumpelhin point khat an hmu.
Group A atang hian Brazil club Palmeiras leh USA club Inter Miami ten last 16 an lut. Last 16-ah Brazil club pahnih Palmeiras leh Botafogo te an inhmachhawn dawn a, inkhel hmuhnawm tak a nih ngei a rinawm. Inelna thlengtu Inter Miami leh PSG an inhmachhawn dawn bawk a, Lionel Messi hovin Inter Miami in PSG lakah fiahna hautak an hmachhawn a ngai dawn.