An goal thun khawl Robert Lewandowski chhuah hnua hmatawng bil deuh ta tlat Bayern Munich chuan Inrinni zan Bundesliga inkhel pa-khatah 1-1-in an mikhual Eintracht Frankfurt an inhnehtawkpui leh ri-ngawt a, tun kha an game hnuhnung pa-thuma 1-1 draw result vawithum an neih tlinna a ni ta reng mai!
Allianz Arena inkhel-ah reigning champion tan Leroy Sane chuan Tho-mas Mueller siamsak atangin minute 34-ah mualneitu team hma-hruaina goal thun mai bawk mah se second half-ah Eintracht lamin phui takin tlarhnung an veng zui ta tlat a; minute 69-ah phei chuan Daichi Kamada chhawpsak atangin forward Randal Kolo Muani chuan mal leh mala a hmachhawn a France team mate Dayot Upamecano pelin mi-khual siphurh a sut ta hial a, tun season league kal laia a goal sarih tihluhna a ni nghe nghe.
Goal dang luhbelh loin Bayern-in an kawt-kaiah point hnih an hloh then a, Bundesliga table-a an hmahruaina a der-thawng zual sauh.
He result avang hian German champion chuan point khat chauh-in pahnihna luahtu Union Berlin an kalsan tawh a; Union hian Inrinni Berlin derby-ah sihnih faia Hertha hnehin point 36 nen Munich club mawng-phe an hmu pha tawh.
A mawngphah chung chiah luahtu Hertha hi an match khelh hnuhnung vawisariha vawiruk an tlawm tlin tak avangin derby-a an tlawm hnu lawk khan an sports director Fredi Bobic an ban nghal a; khelh 18-a point 14 chauh hmu chungin tlakhniam theih-na huang chhungah an tang nghet zel a, point hnihin safety zone an chuangkai zo lo.
Zirtawpnia 2-1-a VfB Stuttgart hnehtu RB Leipzig chuan point 35 nen table-ah pathumna luahin, Inrinni zana Bayern Munich inhneh-tawkpuitu Champions League club ve bawk Eintracht Frankfurt-in point 32 nen pangana an luah ve thung.
February ni 14 khian Champions League last 16-ah Bayern hian Paris St Germain an luhkhung dawn a, tualchhung football lama an hlim loh lai takin Europe-ah an dakchhuak dawn!
Bavarian-ho hian an record kawl lai belh-chhah turin a zawna league title vawi 11 lak tlin an tum leh mek a, an hmahruaina erawh a derthawng tawh hle mai.
Chak harsat Bayern chak zo leh ta lo!
Get real time updates directly on you device, subscribe now.
Next Post