Chak turin kan tho leh ang – Lalsawta

Chak turin kan tho leh ang – Lalsawta
Lunglei Municipal Council inthlanah hlawhtling zo lo mah se, an tlu thlen dawn loa, chak turin an tho leh dawn tih Congress president Lalsawta chuan a sawi.
LMC inthlan result puan tak thlirleta Congress Bhavan-a inkhawmah Lalsawta chuan Lunglei Municipal Council inthlanah an party-in theihtawp an chhuah chungin an hlawhtling zo ta loa, tumah dem tur an awm lo tih sawiin, “Pathian duh dan anga Mizorama thil a thlen theihna turin kan thawk zel dawn a, kan beidawng dawn lo, kan phur sauh sauh zawk a ni. Vawiinah hian kan tlu a, tlu hlen reng tur kan ni lo, chak turin kan tho leh ang,” a ti.
Sum chakna hmachhuan loin an party candidate-ten theihtawp an chhuah a, tunah hnehna chang rih lo mah se, mipui rilruah sum leh pai hnawl duhna thuk takin an tuh tih Congress president hian a sawi. “Sum hmang tam tam chak tur ni se, state sawrkar fawng vuantu MNF candidate-te eng party mahin kan hneh a rinawm loh. LMC-a hnehna changtu ZPM hi an hlawhtlinnaah Congress party chuan a lawmpui a, LMC sawrkar tha tak siam turin duhsakna ka hlan a ni,” a ti.
Congress party chuan LMC inthlana Congress candidate-te an chhuang takzet tih sawiin, sum leh pai hmachhuan loa an ding ngam chu Mizorama inthlan awm zel turah nghawng tha tak a neih an beisei tih an sawi a ni.