Kum 50 hnuah Mobile Phone inthlak danglam nasa hle

Mobile phone-a inbiakna hmasa ber chu kum 50 kalta khan cellphone technology siama inel company pahniha hnathawk pahnih inbiaknaa bul tan a ni a. Khata tang khan he khawl hian hmanna leh tangkaina a ngah ta hle.
Kum 1973 a ni a. Joel Engel, American engineer chu Nasa Apollo programme-a thawk mek niin kuta ken mai theih mobile phone siam tuma hma la mek a ni a. Bell Labs, Engel a hnathawhna hmuna research neihnaah chuan a hma kum sawm kalta vel khan phone lian mangkhen car-phone tih mai tlan paha mi biak theihna an lo siam tawh a. Engel leh a team te chuan chu technology chu tihhmasawn zual tumin khawiah pawha ken mai theih tura siam an tum a ni.
Mahse, 3 April a ni a, Engel a thawhna laboratory-a landline phone chu a ri ral ral a, Engel chuan a la zui a. “Hi, Joel” tih ri a hre zui a, chupa chu Martin ‘Marty’ Cooper niin an elpui ber radio leh electronics company Motorola a hnathawk a ni.
“Cellphone atangin ka rawn bia che a, cellphone dik tak atangin” tia sawiin Cooper chuan, “personal, handheld, portable cellphone” a ti zui a.
Intlansiaknaah chak zawk an awm chiang ta. Reporter leh photographer te hmuh lai ngeiin Cooper chuan New York’s Sixth Avenue, New Jersey a Bell Labs atanga 48 km vela hla a Hilton Midtown hotel atangin phone a hmang a, a lehlama awm Engel erawh a ngawi reng thung.
He mi hnu atang hian khawi atang pawhin inbiakna neih theih a ni zui ta mai a, a rual pawha inbiakna neih theih niin chumai ni lovin rei lo te hnuah text message inthawn theih a ni a, chu chu picture leh emojis inthawn theihin a zui nghal bawk a. Mobile phone chuan mihring te inbiak pawhna chu a thlak danglam chiang hle mai.
Cooper-an phone a hman atanga kum sawmnga a ral meuh chuan mobile phone te chu multi-functional a ni tawh. Mihring nunphung thuk takin a thlak tawh a, a thenah chuan beisei loh lam daihin a ni bawk.
Cooper-a phone siam chhuah kha chu brick pianphung ang, lian tak, antenna lian tak nei leh screen nei lo a ni a. A mawiin a nalh lo va, mahse, chhinchhiahtlak ber a ni thung. Cooper-an Engel a biakna kuta hum theih kha mobile phone call hmasa ber a ni ta a ni.
US sorkar chuan heng project te hi a tuipui em em a, mahse, technical leh regulatory lama thlak danglam ngai te siam turin hun a duh thung a. Kum 10 a ral leh meuh chuan chung khawl te chu consumer te hman theiha chhawpchhuahin a awm ta a, mobile phone era chu a intan ta a, chu era ngei mai chuan kan nunphung thuk takin a thlak danglam ta bawk.
A tirah chuan heng mobile phone te hi mipui nawlpui ban phak a ni lo, tiin Leslie Haddon, media and technology, London School of Economics chuan a sawi a, Motorola phone te chu kum 1980 chho vel khan $500 vel lai man a ni.
“Brick chu a ni lo, brick ang mai a ni a, awlsam taka iptea a thunluh mai theih a ni lo,” tiin Haddon chuan a sawi.
Khatihlai kha chuan mobile phone te chu landline hman theihlohna a hman mai tur ang chauh a ni tiin Christipher Windmill, senior lecturer computer science, University of Derby chuan a sawi a. “Inbiakna kha a ni mai a, kum 1970 leh 90s chhova khawl te kha chuan tih theih a nei tlem hle,” tiin a sawi.
Chu mobile phone bultanna tlawm tak chuan theihnghilh a hlawh rang hle. Kum 2006 khan Nokia chuan N95 an tichhuak a, chu chuan FM radio colour screen, stereo speaker leh video camera a keng tel, chumai ni lovin internet access pawh a nei bawk. Thla eng emawti chhung chu market a phone tha ber a ni. Nokia tana vanduaithlak takin, June thla a nih meuh chuan Apple te chuan thil danglam tak iPhone an tichhuak tlat. Tunah kum 2020 chhovah meuh chuan iPhone chu khawvel ata lakhran theih loh a nih tawh laiin “N95” zawk erawh face mask chikhat anga ngaih a ni ta daih zawk tawh.
Mahse N95 leh iPhone te ang khan modern mobile device ah quality danglam tak an pholang a, phone saltiah an ni mai lo, technology hrang hrang hmehbel khawmna an ni. Computer chips leh transistors te an tein an chak tial tial a, a hman theihna a pung zel tia sawiin Windmill chuan, “An processing power kan neih belh zel a, anmahniah sensor tam zawk kan dah belh thiam zel bawk,” tiin a sawi bawk.
Smartphone hmasa lamah khan internet browser bilh tel bakah camera, location service, torches, bluetooth leh accelerometers te bilhtel te chuan phone chu ken dan azirin portrait atangin landscape mode-ah a dah thei bawk a.
Vawiinah chuan smartphone te chu banking hubs, personal assistants, pcoked-sized cienmea screen leh music player an ni vek tawh. Gyroscopes, barometers, thermometers, magnetometers, infra-red sensors leh fingerprint sensor te an nei vek bawk.
Mobile internet speed te pawh nasa taka hmasawnin 5G internet service te hial a awm tawh a, manufacturer te chuan 6G an sawi hial leh tawh. Phone-a computational power pawh tihsan niin software application turu deuh deuh chuan kawng a hawng zel bawk.
Damdawi lamah pawh brain surgery neihnaah iPhone te chuan khawl man to lutuk endoscope hmanga video captured na te chu a thlak tawh a. Covid-19 pandemic lai pawh khan bluetooth hmangin software engineer te chuan contact tracing system an kalpui thei a, hripui kai bul hnaia awm chuan ‘ping’ tia hriattirna dawn theih a ni. Video calling hmangin medics te chuan hmun kilkhawr zawka damlote an enkawl thei bawk.
Artificial intelligence leh data thahnem tak lakhawma dahkhawl thei smartphone te tangkawp chuan opportunity a siam a. British art-up Novoic te chan machine learning hmangin mobile phone a an tawngkam anlayse in Alzheimer’s Disease vei tur an hre thei a ni.
Tun hnaiah researchers te chuan smartphone hmangin tactile maps an tih mai visual impairments tena an chhehvel an hriatfiah theihna tur an siam mek bawk a. Hemi hmang hian mit tha lote chuan an screen khawihin chu mi hmang chuan an chhehvel an hriatfiah theih phah a. Phone app pakhat HapticNav te chuan vibration hmangin wristband nena thlunzawmin an kal duhnaah hruai thlen theih turin hlawhtling takin an kalpui a ni.
School classroom-ah erawh mobile phone te lawm a hlawh lem lo rih a, zirlaite rilru la pengtu a la nih zawk laiin interactive learning lamah erawh hmanrua pawimawh a ni thung a. Duolingo apps te hmangin language learning tihawlsam a ni a, Complete Anatomy app te chuan medical zirlaite chu mihring taksa awlsam zawka an hriatfiah theihna turin a kalpui thung.
Heng apps te hi education democratise-tu niin PC man to tak tak emaw headset man to mamawh a ni lo, device tinah augmented reality emaw virtual reality hman mai theih a ni tlat tawh.
Phone te chu natural world te nena inzawmna min siamtu a ni tawh bawk a. Apps heng PictureTghis emaw Google Lens hmangin plants te hriatfiah zung zung theih a ni a, loneitute chuan phone-based apps hmangin weeds, disease, pests chi hrang hrang te an hrefiah zung zung thei tawh bawk.
Loneitute chuan an phone-based tools te hmangin irrigation schedule te, local weather station atangin data te an la zung zung thei tawh a. Scientists te chuan forest cabron sequestration pawh LiDAR scanner hmangin an enfiah reng thei tawh a, LiDAR scanner hi tunlai phone thaah chuan dah deuh vek ni tawhin LiDAR tih hi “Light Detection and Ranging” tihna niin room-a object awm te chu 3D digital mode in pulsed laser hmangin an hlat lam a teh zung zung thei a ni. Chutiangin IKEA Place app hmangin i chenna-a furniture dahin inchhung hmel a tihdanglam dan tur te hriat theih vek a ni tawh bawk a. University of Cambridge a researchers te chuan phone sensors hmangin ram ngawa thingkung len lam tehin ram ngaw hriselna an hriat theih phah tawh bawk.
Smartphone te chuan harsatna a siam rualin hlawkna a keng tel hnem hle. Smartphone addiction thlenin social media Instagram leh Twitter addict theih a ni a. Naupangte mental health pawh a khawih nasa hle bawk.
Tun thlengin phone ziarang chu in ang deuh vek la niin ‘candy bar’ ang tak vek a la ni a, tun hnaiah erawh folding phone te siam niin ipteah awlsam zawka ah mai theih a ni ta, tiin Elizabeth Woyke, author of The Smartphone: Anatomy of an Industry tiin a sawi.
Chutihlaiin smart glasses te a awm tawh a, smartphone theihna chu wearable technology lamah pawh belh zel a ni ta. Google Glass chu a hlawhchhama ngaih a ni chungin smart glasses erawh hma lam hun nia ngaih a ni.
Hmana Engel a phone lianpui khan danglamna a va thlen nasa ta em