Chak vek chungin Real an tlang

Thawhleh zana Champions League khelhah Real Madrid chuan 1. FC Union Berlin lakah si an phurh hmasak zet hnuin hnehna an chang let a, grout match ah chak vek chungin last 16 an lut.
Group C-ah champion ni chiang tawh chungin Real Madrid hi German club 1. FC Union Berlin hmachhawn turin Olympiastadion, Berlin-ah an lenglut. Mikhual an nihna hmunah goal chhuah hmasa mah se chawlhlawk hnu lama goal thum an thun hmangin hnehna an chang let. Champions League-a club hlawhtling ber Real Madrid lakah hian 1. FC Union Berlin tan minute 45+1-ah Kevin Volland chuan goal a thun a. Rin loh takin si khat faia hmahruai chungin chawlhlawk an hmang.
Chawlhlawk hmain goal thun thei lo mah se Real Madrid in chawlhlawk hnu lamah goal thum ngawt an thun ta thung. Minute 61-naah Rodrygo siamsak atangin Joselu chuan goal thunin an si phurh a sut a. Joselu vek hian minute 72-naah Garcia siamsak atangin hma an hruai letna goal a thun zui leh nghal.
An mualah hnu fua zawk an nih hnuin 1. FC Union Berlin an khel tha zui viau a, an huaisen rah sengin minute 85-naah Alex Král chuan goal thunin an si phurh a sut. Team lian leh ropui lakah tlawm an pumpelh dawn emaw tih hnuah palian er let an tuar lova, hun tap dawn hnaihah goal an chhuah zui leh. Minute 89-naah Jude Bellingham siamsak atangin Dani Ceballos chuan hma an hruai nawn lehna goal a thun a. Goal dang luh belh lovin Real Madrid hian 3-2 in hnehna an chang zui ta a ni.
1. FC Union Berlin lakah an chak leh tak vangin Champions League-ah vawi 14 zet champion tawh Real Madrid chu group match ah chak vek chungin an tlang a, hnuhma ropui an hnutchhiah. Real Madrid hnuhma hnutchhiah ang hi Manchester City in hnutchhiah thei dinhmunah an ding mek a. Nilai zana an khingpui Red Star Belgrade an hneh a nih chuan champion lai City hian chak vek chungin last 16 an lut ang. UCL champion ngun ber Real Madrid in Europe a club ropui ber an nihzia an lantir nawn leh a, record dang an siam leh hnuin, champion tura rinkai an ni zui leh bawk.
Group C-ah pahnihna ni chiang tawh Napoli chuan Diego Armando Maradona muala an mikhual Braga chu si hnih faiin an hneh a, point 10 hmu last 16 an lut a, an chunga awm Real Madrid nen point riat zetin an inthlau. Sporting Braga hian point li an hmu a, Europa League last 16 playoff an khel zui ang.