Chakma-te tan Mizo tawng thiam hlutna larsap-in sawi

Chakma-te tan Mizo tawng
thiam hlutna larsap-in sawi
Mizoram Chakma Students’ Union Zonal Hqrs. Aizawl buatsaih zirlai tharte lawmluh leh awareness campaign chu Inrinni khan Aizawlah hman a ni a. Larsap Dr Hari Babu Kambhampati chuan a hmanpui.
Chakma Autonomous District Council Executive Committee tum 11-na, kumin October 4-a neihin, primary atanga a chunglamah Mizo subject zirna kalpui tura thutlukna a siam tih larsap hian a sawi a. Hei hian zirlaite tawng chihnih bel taka thiam kawngah a pui thei dawn a, Mizo tawng thiamna chuan Mizote nena inbiakpawh leh inhriatthiam kawngah thui takin a puih theih dawn bakah zirna leh hnathawhna hmun thlengin a pui thei dawn tih a sawi a ni.
Zirna chawisan kawngah Mizo zirlai pawl dangte nen lungrual leh inzahtawn taka hma lak tlan a pawimawh tih sawiin, “Tualchhung amite tih dan leh hnam ziarang zira inherrem pah chung leh, an kalphung, khawtlang nun leh rinna zah tak chung zelin inkawmho leh thil tihhonaah in hnam ziarang leh tih dan phung pholangin chawinun zel tum ang che u,” a ti.
Zirlai dangte nena tan ho a awlsam zawknan Chakma zirlaite chu school leh college-a infiamna, zirna leh hmalakna hrang hrangah tel tam a, hnamdang nena inthianthatna nghet siam ngaipawimawh turin Dr Hari Babu Kambhampati hian a chah a. Zirna chuan zirlaia tihthat ngawt ni lo, mihring puitlinga siam lam thlengin a huam tel, tiin, zirna chuan indaidanna tizimin khawtlangah inpumkhatna a siam thei tih a sawi a ni.
Zirlai kalkhawmte chu zirlai mai nilo, hnam ziarang chawilartu leh khawtlang nun siamthatu an ni tel tih a sawi a. India ram hmundang ruala Mizoramin hmasawnna kawng a zawh chhoh mek zelah hmabak eng tak a neih theihnan a chhunga cheng zirlai hrang hrangten chanvo pawimawh tak hlen chhuah tur an nei tih a sawi bawk.
He hunah han Aizawla awm Chakma zirlaite inzirtir leh infuihthar niin, zai leh hnam lam ngaihthlaka thlir ho a ni.