Chaltlang Tourist Lodge-a 4-star aia hniam lo hotel dinna tur tifel

Development of 4-Star or Higher Category Hotel at Tourist Lodge Chaltlang Aizawl, Mizoram on Design, Build, Finance, Maintain, Operate, Manage & Transfer (DBFMOMT) Basis” hnuaia Tourist Lodge Chaltlang hmunah 4-star aia hniam lo hotel dinna tur ‘concession agreement’ chu Thawhlehni khan Mizoram Tourism department leh Mts Hotel Polo Towers Ltd. Shillong Meghalaya chuan an ziak.
He hmalakna hi sawrkar laipui Ministry of DoNER leh Mizoram Planning & Programme Implementation department bultan a ni a. 2024 February 19 khan Kolkata-ah Road Show neiin Mizoram sawrkar chuan Tourist Lodge Chaltlang hi hotel changtlung zawka siam a nih theihnan PPP mode-a kalpuina tur ruahmanna a lo siam tawh a. Tihhlawhtlin a nih theihnan Ministry of DoNER hnuaia Invest India chuan theihtawpin hma a lakpui a ni.
Inremnaah hian state sawrkar aiawhin Tourism commissioner & secretary Vanlaldina Fanai chuan hming a ziahhnan a, company aiawhin Hotel Polo Towers Ltd. chief financial officer & whole-time director Prashant Gupta chuan a hming a ziahhnan a ni.
Aizawl khawpuiah 4-star emaw a aia chung emaw thlen in tha hi a la awm loa, Mizoram chu India rama state zinga hetiang mikhual thlenna tha nei lo awmchhun state a ni tawha hriat a ni. Hei vang hian Mizoram sawrkar chuan Chaltlang Tourist Lodge tihchangtlun thaa hria in hma a la a. Hotel Polo Towers Ltd nena inremna hi siam mah se, a hmunhma erawh sawrkar ta a la ni reng dawn tih sawi a ni.
He project hmang hian Aizawlah khualbuk tha leh changkang zawk, khualzinte tana hmun tha tak a siam dawn a, tualchhung mi tam tak tan eizawnna hna leh revenue tam zawk a siam chhuak dawn tih sawrkar chuan a sawi.
State sawrkar duh dana Chaltlang Tourist Lodge tihchangtlunna tur hi Mizoram Public Procurement Rules 2020 tlawhchhanin tualchhung leh national newspaper-ah advertisement tihchhuah a ni.
8 2025 May 16 khan State Procurement portal-ah e-tender tih chhuah niin, Hotel Polo Towers Ltd. hi chhangtu awmchhun a ni. Endik a nih hnuah an chhanna hi engkimah an tling tawk tih hmuh a ni a, agreement hi ziahpui an ni ta a ni.
8 Tuna inremna ang chuan, Hotel Polo Towers Ltd. hian kum 30 chhung atan DBFMOMT basis-in hna a thawk anga, kum 10 dang tum hnih pawhsei theih a ni ang. Inremna ziah atanga ni 45 chhungin a hmunhma hi Hotel Polo Towers Ltd. hnenah hlan a ni ang.
8 He hotel-ah hian pindan 60 (pindan 40 danga tihlen belh theih) tal awm tura tih a ni a, darkar 24 inhawng, multi-cuisine coffee shop, specialty restaurant, lounge leh executive health club (gym leh spa facility awmna) nei ngei tura tih niin, 5-star hotel-a hlankai theiha kalpui tum a ni.
8 Hotel Polo Towers Ltd. hi India hmarchhak-a hotel company lian ber a ni a, tunah hian hotel 9 enkawl mekin hotel dang 7 hmalak mekna a nei a; chu’ng zingah chuan Meghalaya, Tripura, Nagaland leh Indian Railways nen PPP project an kalpui pawh a tel.