Champhai district atanga vawk thawnchhuah khap

Champhai district magistrate chuan an district-a vawk lakluh leh an district atanga vawk lakchhuah a khap.
Tunhnaiah Champhai district-ah vawk damlo leh thi an awm leh nual tawh avangin district magistrate hian Sec. 144 CrPC 1973 (Act II of 1973) in thuneihna a pek angin, vawk natna hri a darh zel lohna tur leh hemi laka district a him zel theihna turin khapna thupek hi a siam a. Champhai district-ah ram dang leh state dang atanga vawk, vawksa leh vawksa atanga siam reng reng lakluh phal a ni loa; district dang atanga vawk, vawksa leh vawksa atanga siam lakluh leh district danga thawn chhuah khap a ni bawk.
District chhung veng dang/ khaw dang atanga vawk, vawksa leh vawksa atanga siam lakluh leh thawn chhuah phal a ni loa,
vawk damlo talh khap a nih bakah vawk damlo a awm chuan dahhran thuai a, vawk thi reng reng thuk taka phum tur a ni tih a sawi. Vawk thi leh damlo an awmin AH & Vety Official-te hriattir vat tur a ni.
He thupek zawm lo chu IPC Sec 188 hmanga hrem an ni dawn tih a sawi a. Thupek hian chhuah a nih atanga thlahnih chhung a huam dawn a ni.