Aizawl West-II bialtu MLA, minister Lalruatkima chuan Govt. Gairigaon Primary School building zauhna MLA Fund Rs. 6,49,000 senga sak chu a hawng a, Govt. Dinthar High School-a tlawh nghal bawk.
Dinthar Local Council leh NGO-te thahnemngaihna leh inpekna zarah Govt. Gairigaon School-in building tha tak Dinthar Vengin a nei thei chu lawmawm a tih thu a sawi. Mizoramah tawng pathum – English, Hindi leh Mizo tawnga zirna sikul a tam lo hle a, Gairigaon School-in tawng chi thuma naupang an zirtir thin chu ropui tiin, primary school chu naupang tan tawng zir leh thiam awlsam hun lai tak a nih avangin he school atanga zirchhuakte tan a hlawkthlakin, naupangte an vannei hle tih a sawi a ni.
Govt. Gairigaon PS hi kum 1962-a din niin, building zauh takah hian class room pali a awm belh a. Tunah hian zirlai 115 leh zirtirtu 6 an awm.
Minister hian Dinthar High School-a tlawh nghal a. Tunlaiah zirlai zingah chanchinbu leh lehkhabu chhiar thin an tlem sawt hle nia a hriat thu sawiin, zirlaite chu lehkha chhiar uar turin a chah. Social media hman kawngah an zirlai tana tangkai bak chu khawih tam lo turin a chah. Zirlai zingah nu leh pa zahna a tlahniam hle nia a hriat thu sawi bawkin, “Eng dinhmunah pawh dingin, eng hna pawh thawk ila, in nu leh pate theihnghilh suh u,” a ti.
Dinthar High School hi kum 1989-a din a ni a, tunah hian zirlai 45 awm mekin zirtirtu 8 an awm a ni.
Gairigaon PS building hawng
Get real time updates directly on you device, subscribe now.