Champion lai Denver an tla

Thawhtan zing khan NBA conference playoff semi-final khelh chhunzawm a ni a, Minesota Timberwolves la kah point 20 zeta an hmahruaina humhim zo lovin champion lai Denver Nuggets an tla. Inkhel dangah Indiana Pacers in New York Knicks an hneh a, final an lut ve bawk.
Champion lai Denver Nuggets hian semi-final game sarihnaah an khingpui Minesota Timberwolves lakah bul an tan tha a, quarter khatnaah point ngain an chungnung nghal. Quarter hnihnaah point 10 in an chungnung zui leh a, point 15 zeta hmahruai chungin chawlhlawk an hmang.
Point 15 laia hnufual tawh Timberwolves hian quarter thumnaah pawh bul an tan tha mai lova, point 20 zetin an khingpuite hi an phak lo nghal. Quarter thumnaah hian pui zetin an khingpuite an nawr let a, point 14 zeta chungnungin Denver nen an inkar an tizim. Quarter hnuhnung berah an khel tha chhunzawm viau a, point kuain an chungnung zui leh. Inkhel pawimawh takah an khingpuite hi point 8 in an lehthal a. Inlehthalna lian thlentirin champion lai Denver Nuggets an hnawtchhuak. Minesota Timberwolves hian kum 20 zet hnuah Wastern Conference final an luh vawi khatna a ni.
Final lut tura Denver an hneh tum hian Minesota tan Karl-Anthony Towns leh Jaden McDaniels ten point 23 ve ve an thawkchhuak. Minesota hian Wester Conference final-ah Dallas Mavericks an hmachhawn zui leh ang. Final-a Minesota khingpui tur Dallas Maverikcs chuan pathianni zing khan an khingpui Oklahoma City Thunders an hneh nawn leh a, 4-2 a hnehna changin final an lut. Thunders lehthalna final an luh theih nan Dallas Mavericks tan Luka Doncic a khel tha a, treble-double a puitlin. Doncic hian point 29 a thawkchhuak a, ball sawhlet vawi 10 a dawn bakah assist vawi 10 a nei tling bawk. Mavericks hian tun hi kum thum chhunga conference final an luh vawi hnihna a ni.
Thawhtan zinga inkhel dangah Indiana Pacers chuan an khingpui New York Nicks chu point 130-109 zetin an hneh a, 4-3 a hnehna changin final an lut ve bawk. Pacers tan hian Tyrese Haliburton chuan point 26 a thawkchhuak. Pacers hian Western Conference final-ah Boston Celtics an hmachhawn zui leh dawn a. Final game khatna hi May ni 22, nilai zingah khelh tan a ni ang.
Pacers hmachhawn tur Boston Celtics hian conference final an lut thei riau a, season hnuhnung vawi riatah tun hi final an luh vawi rukna a ni a. Season thum chhung a zawna final an luhna a ni bawk.