Champion lai Nadal a tla

Australian Open 2023, ni thumna chu Nilai zing atang khan khelh tan a ni a. Mipa lamah champion lai leh champion leh tura rinkai ber Rafael Nadal chu Mackenzie McDonald hneh lovin a tla a, second round a lut zo lo. Inkhel dangah Felix Auger-Aliassime chuan tlawm a pumpelh hram a. Jannik Sinner erawh chuan awlsam takin hnehna a chang ve thung.
Nadal a che hleithei lo
Australian Open champion lai Rafael hian season round ah American Mackenzie McDonald a hmachhawn a. French Open ah set hloh lova a lo hneh tawh World No. 65 McDonald hi hneh nawn leh thei ngei tura ngaih ni mahse rin lawk loh takin khel chhe zawkah a tang teh tlat a. Set hnih a hloh zawn hnuin hliamin a tibuai zui leh bawk nen set khat lek pawh a la thei lova, chiang takin a tlawm.

McDonald hian Grand Slam ah vawi 22 zet champion tawh Nadal lakah bul a tan tha viau a, set hmasa ber game khatnaah Nadal a break nghal pang. Set khatnaah hian awlsam taka set la thei tur a nih laiin a serve a hum zo lo zauh a, break nei let leh in, set la tho bawk mahse set la turin hah thi kula a beih a ngai. Champion lai lakah set a la hmasa hian phurna nasa zawk leh inrintawkna tam zawk a neih tir a, set hnihnaah pawh bul a tan tha leh viau.

Set khat la tawh MacDonald hian set hnihnaah Nadal serve hmasa ber a break leh nghal zat a, a serve a hum zui bawk nen 2-0 in hma a hruai leh hman. Game thumnaah Nadal break nawn leh thei dinhmunah ding bawk mahse a hun tha neih chu uiawm takin a chhawr tangkai zo lo thung a, Nadal a him hlauh. Harsa taka a serve a hum hnuin Nadal hian a khingpui a break ve thung a, a serve hum zui leh bawk in, 3-2 in hma a hruai let ta hlauh zawk.

Set hnihna tir lamah Nadal-a’n lehthal bawk mahse McDonald a insiamtha thuai a, hun pawimawh takah break hlu zet nei zui leh in, set a la leh ta nge nge a, 2-0 in hma a hruai ta a, player ropui hneh theihna hun tha tak a nei.

Set hnih a hloh hnuin insiamthat ngei tumin Nadal-a’n tan a khawh a. |ha zawka inlan a mamawh em em laiin hliamin a tibuai ta tlat thung. Wimbledon semi-final pawh a lo khelh theih tawh loh nachhan dul thuar nain a tibuai nawn leh a, chet harsa a ti hle. Hliam a nei thar leh hian a rilru a nghawng thui hle a, a hmela lang thei khawpin a hnual nghal vek. Hliam vangin a inhnukdawk mai tura ngaih a nih laiin a khel tlang lui a, a khawngaihthlak hnu hnu hle.

Hliamin a tibuai chunga huaisen leh paukhauh taka inlan Nadal hi a tuan a fum viau tawh nangin Tennis a thiamzia chiang leh zuala a lantirna hun remchang a ni ta hlauh zawk. Hliam vang a tuam fum in, ngai awh phak lo viau mahse mawi leh tha tak taka ti dikin point a hmu fo va, set hmasa pahnih aiin point a hmu tam zawk ta hial. Hliam tuar chunga inlan Nadala serve hi hun pawimawh takah McDonald hian hun pawimawh takah a break leh ta hlauh a. A serve hum zui lehin champion lai Rafael Nadal chu 6-4, 6-4, 7-5 in a hneh a, third round a inhlangkai.

Mipa lamah Grand Slam a champion ngun ber ni mek Nadal hi Australian Open 2022 leh French Open 2022 ah a champion hnuin Wimbledon ah hliamin a tibuai a, final a lut phak lo. US Open ah champion ngei tumin inlan mahse a champion zo lo. US Open a khelh hnuah vawikua khel tawhin vawi sarih ngawt chak lo zawkah a tang a, vawihnih chiah a chak. A khelh that loh lai a nih vangin Australian Open 2023 ah pawh beisei san ngam a har viau a. First round ah Jack Draper hneh bawk mahse, Mackenzie McDonald lakah set hloh lovin a tlawm zui leh ta thung.

Australian Open ah second round pawh paltlang lova Nadal hi hliamin a tihbuai vangin a hnual hle a. Kum upat lamah hliam a nei ta fo hian a tum aia hmaah Tennis a chawlhsantir mai a hlauhawm ta hle. Nadal leh McDonald te hi vawihnih an inhmachhawnna a ni a. Vawikhat ve ve chak tawh in, an pahnih inkarah chungnung zawk an la awm thei lo.

Harsa takin Felix Auger-Aliassime a chak
Champion lai Nadal a tlak lai hian mipa lamah champion tura rinkai zinga mi Felix Auger-Aliassime pawh a tla nghak teuh hle a. Canadian Auger-Alia-ssime hian Alex Molcan lakah set hnih a hloh hmasak zet hnuin a khingpui a lehthal thei hram a, third round a lut.

Alex Molcan hian rinkai parukna Auger-Alia-ssime lakah bul a tan tha viau a, set hmasa pahnihna ah game thum ve ve hloh chungin set a la zawn. Dinhmun derthawng taka a din hnuin Auger-Alia-ssime a khel tha zui ta viau thung. Canadian hian game thum hloh chungin set thumna a la a. Set hnuhnung pahnihah game hnih ve ve chauh hlohin chungin set a la zawn leh a, set hnih la hmasa Molcan lakah 3-6 3-6 6-3 6-2 6-2 a hnehna changin third round a inhlangkai.

Harsa Felix Auger-Aliassime a chak lai hian champion tura rinkai pahnih; Daniil Medvedev leh Stefano Tsitsipas te chuan awlsam takin hnehna an chang ve ve a, third round an lut ve bawk.

Kum 2021 finalist Medvedev hian nilaini-a a khingpui tualchhung tlangval John Milkman chu 7-5 6-2 6-2 in a hneh a. Greek third seed Stefanos Tsitsipas chuan minute 92 chhung lekin a khingpui Rinky Hijikata chu 6-3 6-0 6-2 in a hneh hman ve bawk. Inkhel dangah Jannik Sinner chuan 6-3 6-2 6-2 in Tomas Etcheverry a hneh ve bawk.